Зэнэкъокъу фызэхащагъ
ГупыкIышхо зиIэгъэ, футбол клубэу «Асбир» зэхэзыщэгъэ ШъонтIыжъ Нурбый ишIэжь фэгъэхьыгъэ зэнэкъокъу Адыгэкъалэ щыкIуагъ.
ИлъэситIукIэ узэкIэIэбэжьмэ автомобиль зэутэкIым ар хэкIодагъэми, къэлэдэсхэм агу ренэу илъыщт. ШъонтIыжъ Нурбый сабыибэ зиIэ тэу щытыгъ, игуапэу шIушIэным пылъыгъ, спортыр лъэш дэдэу икIэсагъ. Ащ ищыIэныгъэ футболым чIыпIэшхо щиубытыщтыгъ.
Футбол цIыкIумкIэ зэнэкъокъур Лъэцэр Хьазрэт ыцIэ зыхьырэ спорт комплексым щыкIуагъ. Ащ хэлэжьэгъабэмэ Нурбый дэгъоу ашIэщтыгъ. Купэу «Асбир» я 2-рэ чIыпIэр къыхьыгъ.
Тэхъутэмыкъое районымкIэ Бжыхьэкъоежъым къикIыгъэ футболистхэм я 3-рэ чIыпIэр аубытыгъ. Теуцожь районым икупэу «Чэчэнай» зыфиIорэр ары зэнэкъокъум щатекIуагъэр. Футболист анахь дэгъухэм хэушъхьафыкIыгъэ шIухьафтынхэр афагъэшъошагъэх, кубкэхэр, дипломхэр, медальхэр, ахъщэ аратыгъ.
БЗЭШIУ Асхьад.