Зыгъэпсэфыгъо мафэхэм зэхащэщтхэр
Илъэс къэс мэкъуогъум и 23-м Дунэе олимпийскэ мафэр хагъэунэфыкIы. Ащ къыдыхэлъытагъэу Урысыем ишъолъырхэм Iофтхьэбзэ зэфэшъхьафхэр ащыкIощтых. Хабзэ зэрэхъугъэу, ахэм нэбгырэ миллионым ехъу ахэлажьэ.
МэфэкI зэхахьэхэм ахэлажьэх Олимпиадэ джэгунхэм ячемпионхэр ыкIи хагъэунэфыкIырэ чIыпIэхэр къащыдэзыхыгъэхэр. Программэм хэхьэх мастер-классхэр, къэгъэлъэгъонхэр, футболымкIэ зэнэкъокъухэр, нэмыкIхэри.
МэфэкIым фэгъэхьыгъэ спорт Iофтхьабзэхэр Мыекъуапи щызэхащэщтых. Республикэ стадионэу «Зэкъошныгъэм» дэжь флешмоб щыкIуагъ, джащ фэдэу райдерхэм яфестиваль, теннис цIыкIумкIэ команднэ зэнэкъокъухэр рагъэкIокIыгъэх. Мэкъуогъум и 25-м Iофтхьабзэу «ЩыIэныгъэм екIурэ лъэбэкъу минипшI» зыфиIорэр республикэм икъэлэ шъхьаIэ игупчэу «Зэкъошныгъэм» щыкIощт. Мы мафэм пчэдыжьым сыхьатыр 9-м урам баскетболыр зыгу рихьыхэрэр Мыекъуапэ илицееу N 34-м щызэрэугъоищтых. Мэкъуогъум и 27-м футбол цIыкIумкIэ зэнэкъокъухэр гурыт еджапIэу N 11-м щызэхащэщтых.
Iофтхьабзэхэм якIэщакIох Адыгеим и Олимпийскэ советрэ Мыекъуапэ физическэ культурэмкIэ ыкIи спортымкIэ и Комитетрэ.
БЗЭШIУ Асхьад.