Тиспортсменхэм Ялтэ зыщагъасэ
Красногвардейскэ районым ибоксерхэм яегъэджэн-зыгъэсэн угъоинхэр Ялтэ щэкIох. Республикэу Къырым боксымкIэ и Федерацие Iофтхьабзэм кIэщакIо фэхъугъ ыкIи ар мэкъуогъум и 28-м нэс рагъэкIокIыщт.
Егъэджэн-зыгъэсэн Iофтхьабзэм къыдыхэлъытагъэх Урысыем спортымкIэ изаслуженнэ мастерхэм ыкIи боксер-профессионалхэм ямастер-классхэр. Джащ фэдэу спортсмен ныбжьыкIэхэм загъэпсэфыщт, Ялтэ зэрагъэлъэгъущт, аквапаркым щыIэщтых.
Угъоинхэм язэхэщэн пэщэныгъэ дызэрехьэ Къырым изаслуженнэ тренерэу Виктор Лысенкэм. Зэфэхьысыжьхэм ялъытыгъэу 2005 — 2014-рэ илъэсхэм къэхъугъэ пшъашъэхэр ыкIи кIалэхэр боксымкIэ зэIухыгъэ муниципальнэ зэнэкъокъум хэлэжьэнхэ алъэкIыщт. Советскэ Союзым гъогогъуитIо и ЛIыхъужъэу летчикэу Амет-хан Султан ишIэжь Iофтхьабзэр фэгъэхьыгъ.
Адыгеир къэзыгъэлъагъохэрэр тренерэу Вячеслав Гарагаль ыгъэсэрэ спортсмен ныбжьыкIэхэр ары.
БЗЭШIУ Асхьад.