Лъэпкъ губзыгъагъэм изы Iахьых
Мыгъэ егъэджэкIо-гъэсакIом и Илъэсэу агъэнэфагъ. Ащ елъытыгъэу Урысыем щызэдэпсэурэ цIыф лъэпкъыбэр нахь зэпэблагъэ шIыгъэнхэр мэхьанэ зиIэ Iофыгъошху. Ар зэшIуихэу гъэпсыгъэ илъэс заулэ хъугъэу зэхащэрэ проект инэу «Лъэпкъ литературэхэр – Урысыем ис пстэумэ апаех» зыфиIорэр.
[caption id="attachment_134626" align="aligncenter" width="800"] Iэшъынэ Аслъан.[/caption]БэмышIэу литературэмкIэ антологиер я VI-у къытырадзагъ, ар анахьэу зыфэгъэхьыгъэр цIыф лъэпкъ зэфэшъхьафыбэу тихэгъэгу щызэдэпсэухэрэм яфольклор ары. «Народная мудрость» ащ зэреджагъэхэр. ЛIэшIэгъухэм апсыхьэгъэ акъыл Iушыгъэр зыхэгощэгъэ гущыIэжъхэм ыкIи гущыIэ щэрыохэм ар афэгъэхьыгъ. Тхылъым дэгъоу лъэпкъ пэпчъ игубзыгъагъэ ахэмкIэ щыгъэунэфыгъ, адыгэ гущыIэжъхэми яфэшъошэ чIыпIэ щагъотыгъ. Мы IофшIагъэр зыпшъэ ифагъэр гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм фольклорымкIэ иотдел ипащэу, филологие шIэныгъэхэмкIэ докторэу Цуекъо Нэфсэт. Мы мафэхэм гъэзетэу «Адыгэ макъэм» иредакцие ащ гущыIэгъу тыщыфэхъугъ.
— Нэфсэт, антологием адыгэ гущыIэжъхэу, гущыIэ щэрыохэу къыдэхьагъэхэр оры зыгъэхьазырыгъэхэр. Мыщ фэдэ IофшIэныр сыд фэдагъа оркIэ? Анахь мэхьанэ зэптэу унаIэ зытетыгъэхэр?
— Пстэуми апэу кIэзгъэтхъымэ сшIоигъор хэтрэ цIыф лъэпкъкIи анахь уасэ, пIуныгъэ-гъэсэныгъэ мэхьанэшхо зиIэ фольклорым иIахьэу гущыIэжъхэмкIэ гъэзагъэу Iоф сшIэнэу зэрэхъугъэр зэрэсигопагъэр ары. Лъэпкъ напэр, лъэпкъ культурэр зэрашыхэрэр бзэр, литературэр, анахьэу фольклорыр ары. Ащ изы Iахь инэу гущыIэжъхэр анахь гушъхьэлэжьыгъэ шIагъохэу, IупкIэхэу, ушъагъэхэу, щэрыохэу щытых. Ахэм гуфаплъэу узахаплъэкIэ, зие лъэпкъым ыгу, ышъо, игупшысэ лъагэ ахэолъагъо. Сигуапэу мэзэ зытIущым мы темэм Iоф дэсшIагъ.
— Адыгэ губзыгъагъэр сыд фэдэ шапхъэ иIэу тхылъым къыщытыгъа?
— Илъэс заулэ хъугъэу УФ-м «Урысые Федерацием щыпсэурэ лъэпкъхэм ялитератур» ыIоу проект щыпхыращы. Антологием изэхэгъэуцон цIыф лъэпкъ пшIы пчъагъэ хэлэжьагъ. ПстэумкIи зэрэщытэу тхылъым гущыIэжъ мин 14,5-рэ къыдэхьагъ. Ащ хэлэжьэрэ лъэпкъ пэпчъ ышIын фэягъэр пчъагъэмкIэ 200 — 300 ыкIи ащ тIэкIу шIокIэу ары. Тэ адыгэ гущыIэжъ ыкIи гущыIэ щэрыохэу 330-рэ къыдэдгъэхьагъ. Алфавитым тетэу лъэпкъхэр къызэкIэлъэкIох, Адыгеир я 4-у щыт. IофшIагъэр узгъэгъозэрэ тхыгъэм къызэIуехы. Ащ кIэкIэу къыщыIуагъ адыгэ гущыIэжъхэр къызэраугъоигъэхэр, къэзыугъоигъэхэр, шIыкIэ-амалэу ащкIэ агъэфедагъэхэр, къызэрэдэкIыгъэ пчъагъэр. Апэдэдэ ахэм зафэзгъэзагъэу, Iофышхо зылэжьыгъэхэр къыщыIуагъэх: адыгэ тхэкIо инэу Лъэустэн Юсыф, шIэныгъэлэжьхэу Хъуажъ Махьмудэрэ Хъут Щамсудинрэ, шIэныгъэлэжьхэу Блэгъожъ Зулкъарин, Шъхьапэцэ Минэрэ Афэсыжь Тыркубыйрэ, Цуекъо Алый, Цуекъо Нэфсэтрэ Мхце Бэлэрэ. Антологием къыдэхьэгъэ адыгэ гущыIэжъхэр бзитIукIэ къэтыгъэх — адыгабзэкIэ ыкIи урысыбзэкIэ. Ащ ыпаIокIэ къыдэдгъэкIыгъэ тхылъыр бзищыкIэ, инджылызыбзэр ахэтэу, дгъэхьазырыгъагъ. Мы гущыIэпэ кIэкIым лъэпкъым егъашIэм зэIуигъэкIэгъэ губзыгъагъэр угъоижьыгъэнымкIэ амалэу щыIэхэр — экспедициехэр, командировкэхэр арэу зэрэщытхэр ыкIи адыгабзэр зышIэрэ еджакIохэр, студентхэр мы Iофым къызэрэхэлажьэхэрэр къыщыIуагъ. Джащ фэдэу адыгабзэр бзэ купэу зыхахьэрэр щыгъэунэфыгъ.
«ЗэкIэ тхылъым къыдэхьагъэхэр темэ 40-у гощыгъэ: цIыфым, щыIэныгъэм, хьадэгъум, шIулъэгъум, ныбджэгъуныгъэм, хьалэлныгъэм, тхьамыкIагъом, псауныгъэм, мыхэм анэмыкIхэу нахь мэхьанэ зиIэхэу джырэ лъэхъанымкIэ хъухэрэр къыщытыгъэх».
— Антологием къыдэхьэгъэ гущыIэжъхэр мэхьанэмкIэ сыдэущтэу зэхэгъэгощыкIыгъэха?
— ЗэкIэ тхылъым къыдэхьагъэхэр темэ 40-у гощыгъэ: цIыфым, щыIэныгъэм, хьадэгъум, шIулъэгъум, ныбджэгъуныгъэм, хьалэлныгъэм, тхьамыкIагъом, псауныгъэм, мыхэм анэмыкIхэу нахь мэхьанэ зиIэхэу джырэ лъэхъанымкIэ хъухэрэр къыщытыгъэх.
— Мыщ фэдэ тхылъ тедзэгъу иным адыгэ фольклорым изы Iахьэу адыгэ гущыIэжъхэр ыкIи гущыIэ щэрыохэр зэрэхэуцуагъэхэм сыд шIуагъэу иIэр?
— Антологиеу къыдэкIыгъэм «Народная мудрость» цIэу фашIыгъэр. Сэ сишIошIкIэ, ар ифэшъуаш ыкIи къегъэшъыпкъэжьы. Мы тхылъышхо ушъагъэу, нэкIубгъо 700 фэдиз хъоу, цIыф лъэпкъ зэфэшъхьафыбэу тихэгъэгушхо щызэдэпсэухэрэм ягушъхьэкIэн лъапIэ — гущыIэжъхэр къыздэхьагъэхэр. Лъэпкъ акъылыр, лъэпкъ губзыгъагъэр мыхэм ахэгощагъ, лъэпкъыр ныбжьи умылъэгъугъэу, умышIэщтыгъэми, ахэм узяджэкIэ, ар зыфэдэр нэм къыкIагъэуцо, цIыфхэр зэрэшIэнхэм имызакъоу, зэрэлъытэ-зэфэгумэкIыжь азыфагу илъ хъунымкIи антологиер IэпыIэгъу инэу сэлъытэ.
— Тхьауегъэпсэу.
ДэгущыIагъэр Мамырыкъо Нуриет.