Сэкъатныгъэ зиIэхэм язэIухыгъэ Урысые зэнэкъокъухэр Республикэу Та­тарстан ипсэупIэу Богатые Сабы щыкIуагъэх.

Iофтхьабзэм спортсмен 25-рэ хэлэжьагъ, ахэм аныбжь илъэси 10-м щегъэжьагъэу 21-м нэс. Санкт-Петербург, Татарстан ыкIи Адыгеим, Воронежскэ, Астра­ханскэ ыкIи Архан­гельскэ хэку­хэм ялIыкIохэм зау­шэтыгъ.

Адыгеир зэнэкъокъухэм къащызыгъэлъэгъуагъэр республикэ спорт еджапIэу N 3-м зыщы­зыгъэсэрэ Нэхэе Дмитрий. Ащ медалитIу къыхьыгъ. Шъхьэ­закъоу зэнэкъокъухэм захэлажьэм ятIонэрэ чIыпIэр къыфа­гъэшъошагъ. Астраханскэ хэкум щыщ Никита Платуновыр игъусэу ящэ­нэрэ хъугъэ.

— Щытхъу тхылъхэр, медальхэр ыкIи шIухьафтынхэр спорт­сменхэм къафагъэшъошагъэх. ЗэхэщакIохэм къагъэхьазыры- гъэ Iалъмэкъхэр, джэгуалъэхэр шIухьафтынэу кIэлэцIыкIухэм ­ара­тыгъэх, шэпхъэшIухэм адиштэу зэнэкъокъухэр рагъэкIокIыгъэх, пстэумкIи тафэраз, — къыIуагъ тиспортсмен итренерэу Татьяна Олейниковам.

Iофтхьабзэм къыдыхэлъыта­гъэу теннис цIыкIумкIэ Федерацием допингым пэшIуекIогъэным фэгъэ­хьыгъэ семинар кIэлэцIыкIухэм ыкIи тренерхэм апае зэхищагъ.