Гъэмафэр къызихьагъэм щегъэжьагъэу физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ишап­хъэхэр зыты зышIоигъохэм япчъагъэ хэпшIыкIэу нахьыбэ хъугъэ.

Мы мафэхэм комплексым итхьамафэ Мыекъуапэ щэкIо, зэкIэмкIи нэбгыри 100 фэдиз хэлажьэ, нахьыбэмкIэ ахэр илъэ­си 6 — 13 зыныбжь кIэлэцIыкIух.

Шапхъэхэр зыщатыхэрэр рес­публикэу стадионэу «Зэкъошныгъэр» ары. Дэгъоу зыкъэзыгъэлъа­гъохэрэм дышъэ, тыжьын, джэрз бгъэхалъхьэхэр афагъэшъуашэх.

Мы мафэхэм сыхьатищым къыкIоцI комплексым илъэныкъуи 6-кIэ заушэтыгъ Адыгеим икъэлэ шъхьаIэ икаратистхэм. Ахэм зэ­кIэми зэрифэшъуашэу зыкъагъэлъэгъуагъ, дышъэ ыкIи тыжьын бгъэхалъхьэхэр къалэжьыгъэх. Шапхъэхэр зытыхэрэр къэчъагъэх, зы чIыпIэ итхэу пкIагъэх, нэмыкI лъэныкъохэмкIи заушэтыгъ.

Джы непэ есынымкIэ амалэу аIэкIэлъхэр къагъэлъэгъощт. Мыекъопэ спорт еджапIэу В. С. Максимовым ыцIэ зыхьырэм зэдегъэштэн есынымкIэ иотде­ление зыщызыгъэсэрэ кIэлэцIыкIу 30 фэдизмэ амалэу аIэкIэлъыр къагъэлъэгъощт.