РафтингымкIэ Мыекъуапэ изэIухыгъэ кубок икъыдэхын фэгъэхьыгъэ зэнэкъокъу Джэджэ районым ипсэупIэу Гончаркэм идендрологическэ парк щыкIуагъ. Адыгеим икомандэхэм ащ текIоныгъэр къыщыдахыгъ.

Мы Iофтхьабзэр къэлэ гупчэ паркым изэIухыгъэ бассейн щызэхащэщтыгъ, ау джырэ уахътэм ащ гъэцэкIэжьынхэр щэкIох. Ащ къыхэкIыкIэ чIыпIэр зэблахъугъ.

Зэнэкъокъум Адыгеир ыкIи Краснодар краир къэзыгъэлъэ­гъогъэ хъулъфыгъэ ыкIи бзылъфы­гъэ командэ 14 хэлэжьагъ. Адыгэ къэралыгъо университетым ипроектэу «Адыгеир — псауны­гъэм ичIыпI» зыфиIорэм къыды­хэлъытагъэу ыпшъэкIэ зигугъу къэтшIыгъэ кубокым икъыдыхын фытегъэпсыхьэгъэ Iофтхьабзэр рагъэкIокIы.

Зэнэкъокъур гъэшIэгъонэу кIуагъэ, хагъэунэфыкIырэ чIыпIэхэр къыдэзыхыщтхэр къэшIэгъоягъ. Ау зэфэхьысыжьхэм къызэрагъэлъэгъуагъэмкIэ, Адыгеим ибзылъфыгъэ ыкIи ихъулъфыгъэ командэхэм (нэбгыри 4 ыкIи 6 хъухэрэм) текIоныгъэр къыдахыгъ. Лэбапэ икомандэ хагъэунэфыкIырэ чIыпIитIу къыфагъэшъошагъ. Новокубанскэ къэзыгъэлъэгъогъэ хъулъфыгъэхэр ятIонэрэ хъугъэх, Адыгэ къэралыгъо университетым физическэ культурэмкIэ ыкIи дзюдомкIэ и Институт ибзылъфыгъэ командэ ящэнэрэ чIыпIэр къыдихыгъ.

Iофтхьабзэм кIэщакIо фэхъугъэх Адыгеим икъэралыгъо учреждениеу «Паркэу П.В. Букреевым ыцIэ зыхьырэр», АР-м рафтингымкIэ ыкIи гребной слаломымкIэ и Федерацие, Мые­къуапэ физическэ культурэмкIэ ыкIи спортымкIэ и Комитет, Адыгэ къэралыгъо университетым физическэ культурэмкIэ ыкIи дзюдомкIэ и Институт.