КIэлэцIыкIу ыкIи Iэтэхъо художественнэ творчествэмкIэ Дунэе фестиваль-зэнэкъокъоу «Адыгеим ижъогъожъыехэр» зыфиIорэр тыгъуасэ Мыекъуапэ къыщызэIуахыгъ, мэкъуогъум и 18-м нэс ар кIощт.

[caption id="attachment_134400" align="aligncenter" width="800"] АР-м лъэпкъ культурэмкIэ и Гупч.[/caption] Лъэныкъо зэфэшъхьафхэмкIэ ащ сабыйхэм зыкъыщагъэлъэгъощт — орэдкъэIонымкIэ, къэшъонымкIэ, Iэмэ-псымэхэм мэкъамэхэр къягъэIогъэнымкIэ, цирк искусствэмкIэ, художественнэ гущыIэмкIэ. Я 14-у проектыр пхыра­щыщт ыкIи, уахътэм къызэригъэлъэгъуагъэм­кIэ, ар еплъыхэрэм ашIогъэшIэгъон. «Культурэм и Урысые фонд» къытырэ грантыр агъэфедэзэ, федеральнэ проектэу «Творческэ цIыфхэр» зыфиIоу лъэпкъ проектэу «Культурэм» къыдыхэ­лъытагъэм тетэу Iофтхьабзэр рагъэ­кIо­кIы. Фестивалыр зыгъэнэфагъэхэр лъэпкъ творчествэмкIэ Къэралыгъо Урысые Унэу В.Д. Поленовым ыцIэ зы­хьырэмрэ АР-м культурэмкIэ и Министерствэрэ. ЗэхэщакIор — культурэмрэ искусствэмрэ алъэныкъокIэ проектхэр пхырыщыгъэнхэм тегъэпсыхьэгъэ автономнэ мысатыу организациеу «Территория культуры» зыфиIорэр ары. КъэбарлъыгъэIэс ыкIи зэхэщэн IофыгъохэмкIэ яIэпыIэгъухэр — АР-м культурэмкIэ и Гупчэрэ КъТРК-у «Адыгеимрэ». Проектым зилъэпкъ культурэ къыщызгъэлъагъохэрэр илъэси 6 — 22-рэ зыныбжьхэу Урысыем ишъолъыри 8-мэ къарыкIыгъэхэр: Къэрэщэе-Щэрджэсым, Къэбэртэе-Бэлъкъарым, Чэчэным, Адыгеим, Краснодар краим, Ростов, Астраханскэ, Волгоград хэкум арых, джащ фэдэу IэкIыб благъэхэм — Иорданием, Израиль, Абхъазым, Армением, Белоруссием ыкIи апэрэу Танзанием, Ливан ыкIи Мозамбик ащыщхэр. IэкIыб къэралыгъохэм апае зэнэкъо­къур заочнэ шъуашэм илъыщт — къагъэхьыгъэ видеотехыгъэхэр яIэубытыпIэхэу осэшIхэр ахэплъэщтых, тикъэралыгъо ишъолъыр зэфэшъхьафхэм къарыкIыгъэхэр Мыекъуапэ щызэнэкъокъу­щтых. УФ-м ыкIи Адыгеим культурэмрэ искусствэмрэкIэ яIофышIэшхохэр ары осэшI купым хэтхэр. Iофтхьабзэм къыдыхэлъытэгъэщт кIэлэцIыкIухэмрэ ныбжьыкIэхэмрэ ясурэтшIыгъэхэм, яIэпэщысэхэм якъэгъэлъэгъон, шъолъырхэм къарыкIыгъэхэм лекцие къафеджэщтых Мыекъуапэ ичIыпIэ гъэшIэгъонхэм афэгъэхьыгъэу, Лъэпкъ музейми ащэщтых. Фестивалыр къэбарлъыгъэIэс амалхэм игъэкIотыгъэу къызэратыжьыщтым имызакъоу, лъэпкъ творчествэмкIэ Къэралыгъо Урысые Унэу В.Д. Поленовым ыцIэ зыхьырэмрэ АР-м культурэмкIэ и Министерствэрэ, АР-м лъэпкъ культурэмкIэ и Гупчэ цифрэ шъуашэ зиIэ ягъэлъэ­гъуапIэхэм арытыщт.