Нижегородскэ хэкум щыкIогъэ зэнэкъокъум илъэс 12 — 14 зыныбжь пшъашъэхэр ыкIи кIалэхэр хэлэжьагъэх. Адыгеим илIыкIохэм ащ чанэу зыкъыщагъэлъэгъуагъ, медалитIу къахьыгъ.

Урысыем ишъолъыр 70-м ­ехъумэ къарыкIыгъэхэр къалэу Кстовэ щызэIукIагъэх. Первенст­вэр зыщыкIогъэ мэфиплIым къыкIоцI спортсменхэм алырэгъум зыщаушэтыгъ, ахэм ащыщэу 464-р — кIалэх, 317-р — пшъашъэх.

Адыгеир къэзыгъэлъэгъуагъэхэр республикэ спорт еджапIэм зыщызыгъасэхэрэм ащыщхэр ары. Нэбгырэ 11-м щыщэу хагъэунэфыкIырэ чIыпIэхэр къыдэзыхын зылъэкIыгъэр спортсменитIу.

Килограмм 71-м нэс къэ­зыщэчыхэрэм якуп хэтыгъэ Нэхэе Артур алырэгъум дэгъу дэдэу щыбэнагъ, дышъэ медаль къыхьыгъ, тренерыр НатIыжъ Азмэт. Джащ фэдэу Тэхъутэмыкъое районым щыщ Бэгъушъэ Алинэ гъэхъэгъэшIухэр ышIыгъэх. Ар зыхэтыгъэ купым ­пшъэшъэ 32-мэ зыщаушэтыгъ. Адыгеим испортсменкэ ятIонэрэ чIыпIэр къыдихын ылъэ­кIыгъ. Москва къикIыгъэ Алина Малининам текIоныгъэр къыфагъэшъошагъ, Кемеровэ хэкум щыщ Алина Коршевар ящэнэрэ хъугъэ. Тэхъутэмыкъое районым испорт еджапIэу N 3-м Алинэ зыщегъасэ, тренерыр Делэкъэрэ Рустам. Тиспортсменхэм ежьхэм гъэхъэгъэшIухэр зэрашIыгъэхэм дакIоу Къыблэ федеральнэ шъолъырым икомандэ зэнэкъокъум текIоныгъэр къыщыдихыным яIахьышIу халъхьагъ.

ТибэнакIохэм тафэгушIо, тапэ­кIи гъэхъэгъэшIухэр ашIынхэу, республикэм ыцIэ чыжьэу агъэ­Iунэу афэтэIо.