Инвер ипоэзие фагъэнэIосагъэх
НыбжьыкIэгъур хэтрэ цIыфкIи анахь охътэ лъапI, — тамэр псынкIэ, гур чэф; пфэмышIэшъуни, зэпымычын гъогуи щыI Iоу пшIэрэп; зэрэдунаеу IаплIыкIэ зэпфызылIэмэ пшIоигъу, ащ етIани гузэхэшIэ блэрхэр къызыхэхьажьхэкIэ, щыIэныгъэр нахь нэфынэу къыпщагъэхъу.
[caption id="attachment_134282" align="aligncenter" width="800"]
А. Iэшъын.[/caption]
Мы зэкIэ зыфэгъэхьыгъэр кIэлэгъу-ныбжьыкIэгъур хэткIи чан-лъэшэу, цIыфым илъэгъожъые цIыкIу зэIуищызэ гъашIэм зэрэфакIорэр ары.
Непэ я ХХI-рэ лIэшIэгъум тыхэхьагъэу тэкIо пстэуми, ущысынэу щытэп, мафэ къэс лъэбэкъу IофшIагъэхэм щыIакIэр агъэпытэ. Анахь мэхьанэ зиIэр пIуныгъэ-гъэсэныгъэр, гушъхьэлэжьыгъэ икъу нэбгырэ пэпчъ ыгъотыныр ары. Мы лъэныкъомкIэ гъэзагъэу, Адыгэ республикэ ныбжьыкIэ тхылъеджапIэм (пащэр ХьакIэмызэ Мадина) дахэу Iоф ешIэ, Iофтхьэбзэ зэфэшъхьафхэу еджакIохэм, кIэлакIэхэм яакъыл, яшIэныгъэ, яамалкъулай ахэзгъахъохэрэр, зыхэпхыхэрэр щызэхащэх.
[caption id="attachment_134283" align="aligncenter" width="800"] А. Iэшъын.[/caption]
ЖъоныгъуакIэм и 8-м, тхылъеджапIэм творческэ зэIукIэгъу щызэхащэгъагъ, ащ ихьакIагъ адыгэ кIалэу, усакIоу, Краснодар щыпсэурэ Шэуджэн Инвер. Ар урысыбзэкIэ матхэ. Урысые ыкIи дунэе литературнэ зэнэкъокъухэм ахэлажьэ, шIухьафтынэу «Триумф» ыкIи Лъэпкъ Премиеу «Золотое Перо Руси-2021» зыфиIохэрэм ялауреат. ЫпсэкIэ зэхишIэрэ пстэур сэнаущыгъэ инэу хэлъымкIэ егъэунэфы, усэ тхылъ заулэ къыдигъэкIыгъ, джырэ уахътэм иусакIу. Ипоэзие цIыфым ыкIи ащ къешIэкIыгъэ пстэум афэгъэхьыгъ, щыIэныгъэр бгъэлъэпIэн, Хэгъэгушхом, лъэпкъым уафэшъыпкъэн зэрэфаер, чIыопсыр ухъумэгъэныр, цIыфыр ежь фэдэ цIыфым фэзэфэныр – джары зэIукIэгъур зыфэгъэхьыгъагъэр. УсакIом илирикэ, къызэджэгъэ усэхэр, къыIуагъэхэр къызэхэхьагъэхэм агу нэсыгъэх. Инвер ищыIэныгъэ ыкIи итворчествэ нахь фэнэIосагъэх, пэблагъэ хъугъэх. ЗэIукIэгъум щыIагъэх студентхэр ыкIи тхылъеджапIэм иIофышIэхэр. НыбжьыкIэхэм урысые усакIоу Шэуджэн Инвер упчIэхэр ратыгъэх, джэуапхэри агъотыгъэх. ЗышIоигъохэм усакIор тхылъхэм афытетхагъ, зэIукIэгъум хэти ыгъэрэзагъ, мыщ фэдэ Iофтхьабзэхэм ныбжьыкIэхэр апсыхьэх.
Мамырыкъо Нуриет.