Адыгэ Республикэм физическэ культурэмрэ спортым­рэкIэ и Комитет пресс-конференциеу щыкIуагъэм кушъ­хьэфачъэмкIэ фестивалэу Урысыем и Мафэрэ кушъхьэфачъэм и Дунэе мафэрэ афэгъэхьыгъэр зэрэ­зэхащэщт шIыкIэм щытегущыIагъэх.

[caption id="attachment_134077" align="aligncenter" width="800"] Сурэтыр: А. Гусев.[/caption]

Мыекъуапэрэ Адыгэ Рес­публикэмрэ ащыпсэу­хэу ыкIи яхьакIэхэу зышIоигъо пстэури фестивалым хэлэжьэнхэу къырагъэблагъэх. Зыныбжь илъэс 12-м нэмысыгъэ кIэлэцIыкIухэм Зэкъошныгъэм ипчэгу ­гъогу шъхьаф щафагъэ­псыщт, ащ хэлэжьэрэ пстэуми шIухьафтынхэр аратыщтых. Илъэс 16-м зыныбжь нэмысыгъэ кIэлэцIыкIухэр Iофтхьабзэм хэлэжьэнхэ залъэкIыщтыр нахьыжъхэр акIыгъухэ зы­хъукIэ ары. ПстэумкIи нэ­бгырэ мини 3-м ехъу ащ хэлэжьэнэу рахъухьэ.

КушъхьэфачъэмкIэ фестивалым километрэ 21-рэ щакIунэу щыт. Километри 4,6-рэ зырыз гъогогъуитфэ къэзыкIухэрэр ары текIоныгъэ къыдэзыхыщтхэр.

Кушъхьэфачъэхэм атес­хэу Мыекъуапэ иурамхэу Пионерскэм, Победэм, Про­летарскэм, Горькэм къарычъэщтых. Ахэм афыхахыщт гъогум автомобиль­хэр къарыкIохэ хъущтэп.

Iофтхьабзэр Зэкъошныгъэм ипчэгу (урамэу Пио­нерскэмрэ Лермонтовымрэ зыщызэуалIэхэрэм дэжь) щырагъэжьэщт, пчэдыжьым сыхьатыр 8-м къыщегъэ­жьа­гъэу 9-м нэс фестивалым хэлэжьэщтхэр атхыщтых.

Зэкъошныгъэм ипчэгу творческэ коллективхэм концерт къыщатыщт. Фес­тивалым хэлэжьэрэ кIэлэцIыкIухэм IэшIу-IушIухэр, пхъэшъхьэ-мышъхьэхэр, псы IэшIухэр апагъохыщтых. Iофтхьабзэр пчэды­жьым сыхьатыр 10-м рагъэжьэщт, сыхьатыр 12-м ар аухынэу рахъухьэ.

Зэхэщэн IофхэмкIэ, цIыф­хэр жъугъэу зыхэлэ­жьэрэ физкультурэ Iоф­тхьабзэхэр зехьэгъэнхэмкIэ отделым ипащэу ТхьайцIыф Артур ащ фэгъэхьыгъэу къыIотагъ.

— Кушъхьэфэчъэ марафоныр зэнэкъокъоу щытэп, кушъхьэфачъэкIэ къызэпэчъэщтхэп ыкIи чIыпIэхэри щагъэнэфэщтэп. Мыр зытегъэпсыхьагъэр цIыф­хэр жъугъэу зыхэлэжьэрэ физкультурэ Iофтхьабзэхэм зягъэушъомбгъугъэныр, цIыфхэм япсауныгъэ гъэпытэгъэныр ары, — къы­Iуагъ ТхьайцIыф Артур.

Анахь ныбжьыкIэу, нахь ныбжьышхо зиIэу фестива­лым хэлажьэхэрэм, спортивнэ унагъом исхэм тын­хэр афагъэшъошэщтых.

— Кушъхьэфэчъэ ма­рафоным хэлажьэхэрэр япсау­ныгъэ къырыкIощтымкIэ ежь-ежьырэу зыфэса­къыжьынхэ, шапхъэу щыIэ­хэр къыдалъытэн фае. Iоф­тхьабзэм хэлажьэхэрэм медицинэ IэпыIэгъу языгъэгъотыщтхэри, якушъхьэфа­чъэхэр зыгъэцэкIэжьыщтхэри ягъусэщтых, — къы­Iуагъ ТхьайцIыф ­Артур.

Iофтхьабзэм хэлажьэ­хэрэм джащ фэдэу зэхэщакIохэм, хэбзэухъумэкIо къулыкъухэм яIофышIэхэм, волонтерхэм игъоу къафа­лъэгъухэрэр къыдалъы­тэн фае. ЫпшъэкIэ зигугъу къэтшIыгъэ шапхъэ горэ зыукъорэр гъогум къытырагъэкIыщт.

Кушъхьэфэчъэ спортымкIэ еджапIэм ипащэу Анатолий Лелюк гъогум ищы­нэгъончъэн епхыгъэ Iофыгъохэм лъэшэу ынаIэ атыригъэтыгъ.

— Iофтхьабзэм хэлажьэ­хэрэм сыд фэдэрэ чIыпIи гъогум къыщытекIынхэшъ, загъэпсэфын алъэкIыщт. Нэужым, ащ падзэжьын, е гъогум къытекIынхэ алъэ­кIыщтэп. Анахьэу кушъхьэ­фэчъэ марафоныр зытегъэ­псыхьагъэр кушъхьэфа­чъэм тесхэу Мыекъуапэ ичIыпIэ дахэхэр зэгъэлъэгъугъэнхэр ары, — къы­Iуагъ Анатолий Лелюк.

МэфэкIым изэхэщакIо­хэр АР-м физическэ культурэмрэ спортымрэкIэ и Комитет, Урысые политическэ партиеу «Единэ Россием» и Адыгэ шъо­лъыр къутам, Урысыемрэ Адыгэ Республикэмрэ кушъхьэфэчъэ спортымкIэ яфедерациехэр ары.