Гъэмэфэ концертнэ пчэгур къызэIуахыгъ
АР-м и Къэралыгъо филармоние дэжь щыIэ зыгъэпсэфыпIэ чIыпIэм зэIухыгъэ пчэгоу щашIыгъэм Iоныгъом и 6-м апэрэ концерт къыщатыгъ.
Концерт программэм хэлэжьагъэх Адыгэ Республикэм и Камернэ музыкальнэ салон иорэдыIохэр. ЦIыфыбэм агу рихьыгъэ орэдхэр ыкIи музыкальнэ композициехэр къырагъэIуагъэх: И. Дунаевскэм и «Мэзэ вальс» ыкIи «ШIу плъэгъурэм ынэхэр», Сэмэгу Гощнагъо и «Адыгэмэ яшэн-хабзэ джащ фэд», Анзэрэкъо Чеслав и «Орэд къаIо, си Адыгей», Анзэрэкъо Вячеслав и «Къэбар дах», Къэбардэкъо Мурат и «Кафа».
— Мыр МыекъуапэкIэ зыфэдэ къэмыхъугъэ хъугъэ-шIагъ. Сигуапэу къыхэсэгъэщы цIыфыбэ пчыхьэзэхахьэм къызэрекIолIагъэр, орэд дахэмэ зэрядэIугъэхэр, чIыпIакIэм гухахъо зэрэщагъотыгъэр. Тэ джащ фэдэ гупчэ тшIынэу тыфэягъ къэлэдэсхэри хьакIэхэри къыщыуцунхэ, языгъэпсэфыгъо уахътэ щагъэкIон алъэкIынэу. АР-м и ЛIышъхьэу КъумпIыл Мурат иIэпыIэгъу ишIуагъэкIэ ар къыддэхъугъ, — къыIуагъ къалэу Мыекъуапэ имэрэу Геннадий Митрофановым.