Шъхьащэкъо Кимэ тегъэгушIо
Гъэхъагъэу иIэхэмкIэ тегъэгушIо тичIыпIэгъу цIэрыIоу, сэнаущыгъэшхо зыхэлъ спортсменэу Шъхьащэкъо Кимэ.
Шъхьафит бэнэнымкIэ ветеран-мастерхэм язэIухыгъэ зэнэкъокъоу Смоленскэ щакIуагъэм килограмм 88-м нэс къэзыщэчыхэрэм азыфагу ащ дышъэ медаль къыщихьыгъ.
Iофтхьабзэм спортсмен 200-м ехъу хэлэжьагъ, ахэр Урысыем ишъолъырхэм ямызакъоу Беларусым, Казахстан, Туркменистан, Узбекистан, Молдовэм, Армением ыкIи Монголием къарыкIыгъэх.
Кимэ илъэшыгъэ мыщ джыри зэ къыщигъэлъэгъуагъ, алырэгъум зыщэбанэм нэбгырищмэ къашIуихьыгъ, финалым Чэчэн Республикэм илIыкIо щыIукIагъ ыкIи текIоныгъэр къыдихыгъ.
Шъхьафит бэнакIохэм я Лигэ фэгъэхьыгъэ зэнэкъокъухэу Москва щыкIощтхэм Шъхьащэкъо Кимэ ахэлэжьэщт.
БЗЭШIУ Асхьад.