Исэнэхьат илъапI, IэпэIас
1976-рэ илъэсым театрэм, музыкэм ыкIи кинематографием я Къэралыгъо институтэу Ленинград дэтыр къыухи, Кушъу Светэ ихэку гупсэу Адыгеим къыгъэзэжьыгъагъ. Джащ къыщегъэжьагъэу, непэрэ мафэхэм къанэсыжьэу, илъэс 46-рэ хъугъэу ыгукIэ икIэсэ театрэм исценэ хьалэлэу щэлажьэ.
А илъэсхэм къакIоцI спектаклэ пчъагъэхэм бзылъфыгъэ образ зэфэшъхьафхэр, зым нахьи адрэр нахь шIагъоу, къащишIыгъэх. Лъэпкъ драматургием щыщ спектаклэхэм ямызакъоу, дунэе ыкIи классическэ литературэм къахэхыгъэ произведениехэм роль шъхьаIэхэр къащишIыгъэх.
Ахэр: У. Шекспир и «Отелло» — Дездемона, Ж. Мольер ытхыгъэу «Тартюф» — Эльмира, У. Шекспир и «Король Лир» — Гонерилья, А. Чеховым иеу «Иванов» — Бабакина, Н. Гоголым ипьесэу «Женитьба» — Агафья Тихоновна, А. Гецадзе иеу «О мардж! Дахэр къэтэщэ» — Теона, Н. Думбадзе и «Если б небо было зеркалом» — тетушка Кито, Б. IутIыжъым ытхыгъэу «Хьацэцэ дах» — Хьацац, Е. Мамыим и «ГъашIэм имэзищ» — Тэмара, А. Шэртаным ипьесэу «Ащэрэмрэ къэзыщэхэрэмрэ» — Цац, Мурэтэ Чэпай и «Шъузабэхэр» — Къарэ, «IэнатIэм игъэрхэр» — Нэшхо, Е. Мамыим и «Псэлъыхъохэр» — ДэнэIап, Нэгъой Инвер иеу «Къандис» — бзылъфыгъэ роль шъхьаIэр, Е. Мамыим и «Мыхьамчэрыекъор, привет!» — ХьакIуащ, Володиным ипьесэхэу «Ящерица», «Две стрелы» — Ящерица, Б. Iутыжъым иеу «Жэмыгъо Африкэм нэсыгъ» — Жэмыгъу, С. Хъунагом иеу «Итальянкэр», нэмыкIхэри.
Светэ бзылъфыгъэ роль гъэшIэгъоныбэу къышIыгъэ пэпчъ щыIэныгъэ шъыпкъагъэр нэм къыкIагъэуцо, гум къинэжьэу гъэпсыгъэ. А зэкIэм алъапс IофшIэгъэ иныр, IэпэIэсагъэр, артисткэм театрэр икIасэу, ежь щыщэу, ищыIэныгъэу зэрэхъугъэр ыкIи зэрэщытыр.
Актрисэм идэхэгъэ ин, ишIыкIэшIуагъэ, иIупэщх шъабэ, нэфыпс-нурэу иIэм, театрэр зикIэсэ цIыфхэр махъэм фэдэу, зэлъаубытыгъэх, емызэщыжь IофшIакIоу, творческэ жьыкъэщэ гъэшIэгъон зыхэлъ артисткэу Светэ зэрэщытыр псынкIэу къэнэфагъ. Джы ар шъхьэкIэфэгъэлъытэныгъэ иныр гуетыныгъэу исэнэхьат фыриIэмкIэ къэзылэжьыгъ, сценэр — театрэр ыгу нэсыпэу, ищыIэныгъэ шъыпкъэ хъугъэх. Адыгэ театрэм щагъэуцугъэ спектаклэ гъэшIэгъоныбэм, ар зыхэмылэжьагъэ ахэтэп пIоу, артисткэр зрителыр зыфэзэщэу, дэзыхьыхыхэрэм ащыщ, роли 100-м нахьыбэ къышIыгъ. Светэ фэдэу бзылъфыгъэ дэхагъэр къетэкъохэу, IупкIэу, ышIэрэ Iофым ыгу нэсыпэу, ыгъатхъэу, сценэр къыдэхъугъэм фэдэу щыIэр зырыз. Игулъытэ, иакъыл, игупшысэ зынэмысырэ щыIэп, джары роль зэхэдз ымышIэу (ауми ироль пэпчъ ренэу гъэчъыгъэ), зыдэлэжьэрэ образ пэпчъ иинэгъэ-лъэшыгъэ е ицIыкIугъэмэкIагъэ емылъытыгъэу, упкIэпкIыпагъэу нэм къыкIигъэуцон зыкIилъэкIырэр. Чэщи мафи, исыхьат, такъикъ пэпчъкIэ сценэм тет, гукIэ-псэкIэ есэжьыгъэу роль пэпчъ решIыкIы ыкIи къырегъэлъэгъукIы.
Бэрзэдж-Кушъу Светланэ артисткэ IэпэIас, IофшIэгъэшхо зиI, бзылъфыгъэ ролыбэу къышIыгъэхэм ыкIи къышIыхэрэм, ар сыдигъуи сценэм фэкIэщыгъоу, къеплъырэ цIыфхэм афэгумэкIэу, искусствэ иным, дэхагъэм ахэр зэрэфищэщтхэм езэщырэп.
Светланэ къызыхъугъэ мафэм мэфэкIым рихьылIэрэ гузэхашIэхэр зэдгъашIэмэ тшIоигъоу гущыIэгъу тыфэхъугъ.
— Уисэнэхьат лъагъо дэх имыIэу урэкIо, уемызэщыжь, псынкIа е къина уартистыныр?
— Сисэнэхьат адрэ пстэумэ атекIы, сценэм мафэ къэс укъытехьаныр гурэ псэрэ бэу зыхахьэрэ. Уироль, образэу къэпшIырэр зэрищыкIагъэу къибгъэлъэгъукIыным Iофышхо дэошIэ — олъыхъо, къэогъоты, пфэгъэхъурэп, уигъэразэрэп, етIанэ… аузэ, ыцыпэ къэоубыты, къызэтеогъэщыкIы, опшъы, огужъые.., ау Iэгутео мэкъэ лъэшым зыкъызиIэтыкIэ, къэбгъэлъагъорэр цIыфхэм ягунэсэу, пшIагъэм, узэрэулэугъэм уегъэгушIожьы.
— Творческэ гъогу иныр щытхъу хэлъэу къэзыкIугъэ уартисткэ цIэрыIу, зыкъэбгъотынымкIэ, сэнэхьатым ишъэфхэр къыпIэкIэхьанхэмкIэ анахьэу къыбдеIагъэхэр?
— УиупчIэ иджэуап сигуапэу къестыщт: зэкIэ тызэдеджагъэхэм Мыекъуапэ къэдгъэзэжьи, IофшIэнышхом тызыпэуцуагъэм къыщыкIэдзагъэу, Тхьэр къысфэупсэу, сигъашIэ дахэу кIэкIы, ситворческэ гухэлъхэр сыдигъуи пшысэм фэдэу къызэпыуцохэу, къызэкIэлъыкIохэу кIэсэщы, ары сэнэхьатым зыфэтэгъэсэфэ, «нэм ылъэгъурэр шъхьэм ыуас», аIуагъэба, яшъыпкъэу къытпылъыгъэх тикIэлэегъаджэхэр, искусствэ лъагэм тызэрэхащэщтымкIэ, сэнэхьатым пэблагъэ тызэрэхъущтымкIэ зышъхьасыжьыгъэхэп, тэри тшIоигъуагъ зэкIэ тшIэмэ. Тихэку тыкъызэкIожьым, Адыгэ драмтеатрэм 1962-рэ илъэсым Москва ГИТИС-р къыщызыухыгъэ нахьыжъ Iушхэр сценэм фытегъэпсыхьэгъэ закIэхэу Iутыгъэх, ахэр IофшIэкIошхуагъэх, артист дэгъу дэдагъэх: КIыкI Юр, Хъурым Мариет, Мурэтэ Чэпай, зэшъхьэгъусэхэ Пэрэныкъо Чатибэрэ Раерэ. Мыхэр цIыфыгъэ ин зыхэлъыгъэх, тызкъуаубытагъ, такIырыплъыгъ, роль зэфэшъхьафхэр тызэготэу къызэдэтшIыгъ, тигушIуагъуи тигумэкIи зэдэдгощыгъ, зыгорэ къыздэхъугъэмэ, а нахьыжъ IэпэIасэхэм ыкIи режиссер шIагъохэу — КIуращынэ Аскэр, ХьакIэгъогъу Къэсэй, мыхэм анэмыкIхэми акIочIэ ин зыхэлъэу сэлъытэ.
— О пшъхьэкIэ сыд фэдэ рольхэр ара уикIасэхэр?
— ЦIыф лъэшхэу, ямышIыкIэ гъэшIэ гъогу хьылъэ къызэпызычыгъэхэу, щыIэныгъэ жьыбгъэхэм къамыуфэхэрэ образхэр къэсшIымэ сэразэ.
— О нахь къыптегъэпсыхьагъэу (уишэн-гъэпсыкIэкIэ), уигъатхъэу къэпшIыгъэу, анахь уикIасэ хъугъэ образыр?
— СикIасэх ыкIи хьалэмэтых Мамый Ерэджыбэ ипьесэхэр, ауми анахь сигъатхъэу сыгу къинагъэр комедиябэу къэсшIыгъэмэ ащыщэу, IутIыжъ Борисэ и «Жэмыгъо Африкэм нэсыгъ» зыфиIорэр ары. Драматург IэпэIасэм мы бзылъфыгъэ образ ялыер егугъоу ыгъэпсыгъ, щыIэныгъэ хабзэхэр ыкIи бзылъфыгъэр зэрэзэдэIорышIэхэрэр дэгъоу щыкIэгъэтхъыгъ, мы образым — Жэмыгъо ироль сыдэлажьэзэ гупшысабэ зэпырызгъэзагъ, сшъхьэкIи сызыфэдэ шъыпкъэр нахь згъэунэфыгъэ, сиартист сэнэхьаткIи мы ролым джыри нахь зыкъызэIусигъэхыгъ. Ащ хэт бзылъфыгъэ хэхьагъэ-хэкIыгъэу, сыд фэдэрэ пси щесын зылъэкIырэ Жэмыгъо иобраз лъэшэу шIу слъэгъугъэ, Iоф дэсэшIэфэ, сэри нахь пытэ сишIыгъ, мы пьесэм гушIуагъуи насыпи къысфихьыгъ.
ЩыIэныгъэр тхъэгъо закIэу зэхэлъэп, лъэпэогъухэми хэти ащ ащыIокIэ, ахэр зэпыпчышъунхэ кIуачIэ мы образым къыпхелъхьэ, узэрегъэплъыжьы, уапэкIэ уегъаплъэ.
— Мыщ фэдиз илъэс пчъагъэм Адыгэ лъэпкъ драмтеатрэм уриартистк, а зы гъогу-лъагъор уубагъэ, укIэгъожьэу, уезэщэу къыхэкIыгъа?
— Театрэр щыIэныгъэр зэкIэ зэрыплъэгъорэ гъунджэм сэ фэсэгъадэ. Илъэсхэм IофшIэкIэ амалхэр, шIыкIэ-IокIэ тэрэзхэу сценэм нахь ищыкIагъэхэр къадэкIуагъэх. «ЩыIэныгъэр зэрэщытэу театр» аIуагъ, ау зыхъукIэ, сикIэсэ сэнэхьатэу сщыщ хъупагъэр — сызыIэтыгъ, сызыпIугъ, сызылэжьыгъ. Загъорэ сэр-сэрэу тIэкIу сызэплъыжьы: сэлъытэ театрэм, сценэм сапIугъэу, сагъэсагъэу, сызэрэщытэу сицIыфыгъэ кIуачIэ агъэпытагъэу.
— Адэ театрэр зэкIэ уищыIэныгъэмэ, нэмыкI щыIэныгъэ лъэныкъохэр — унагъор, быныр, пIун-гъэсэныр сыдэу хъухэра?
— Театрэ IофшIэнышхом а зэкIэмкIэ ишIуагъэ къысэкIыгъ ыкIи къысэкIы. Сценэм къытесхьэрэ образэу згъэунэшкIугъэ пэпчъ иIахь къысхахьэзэ, псыхьагъэ сыхъугъ, непэ сыартисткэ къодыеп, ны, нан, бзылъфыгъэ чъэпхъыгъэ икъугъ (мэщхы). Спхъухэр (тIури) едгъэджагъэх, дгъэсагъэх, ахэр унагъохэм арыс, сипхъорэлъфхэр врачых, юристых, цIыфышIух, пхъорэлъфым ипхъорэлъфыжь пшъэшъэ цIыкIоу илъэси 4 зыныбжьыр сэркIэ зымыуасэ щыIэп. Джащ фэдэ къабзэу, тянэ-тятэхэу тызыпIугъэу тызылэжьыгъэхэр (щыIэжьхэп) зыкIи тщыгъупшэхэрэп, ахэр мыхъугъэмэ тэ тыхэтыщтыгъа, сикъуаджэу Очэпщые дэт унэу сызыщапIугъэм ипчъэ зэIухыгъ, ащ сшыпхъу къыщытпэплъэ, тызэрэлъытэ, тызэфэгумэкIыжьы, а зэкIэм, шIу лъэбэкъу пэпчъ къыпхагъахъо, пкIуачIэ агъэкIэжьы.
— Мы аужырэ илъэс 20-р уитворчествэкIэ, пшъхьэкIэ сыд фэдагъа?
— КIэкI дэдэу къэпIон хъумэ, а илъэс 20-р хэти тызыфытагъ; фабэм, тхъагъом анэмыкI щымыIэм фэдэу къытщыхъущтыгъ, ау мы уахътэм тыкъызхигъэшхъожьыгъ, нахь зызэкIэтыубытагъ, уасэ зэтымытыжьыщтыгъэ шэныбэм талъытхъожьыгъ. Сэ сшъхьэкIэ зыкIи ситеатрэ IофшIэн зэпыуи, зэпычи фэсшIыгъэп, мы илъэсхэм нахь зэкIэупкIэгъэ-хъупхъэ сашIыгъ, етIанэ уиныбжьыкIэгъу уахътэр, гъашIэ къэбгъэшIагъэу, гулъыти, щэIагъи, къэрари, шIыкIи — щыIэр зэкIэ зэбгъотылIэжьы зыщыхъугъэр, уицIыфыгъэ кIуачIэ зыдэпшIэжьэу, тамэ бгъотыныр, сэркIэ осэшIу зиI.
ГъашIэ бгъэшIэныр гъэшIэгъоны ыкIи тхъагъо.
— Света, апэрэ гъэмэфэ мазэм — мэкъуогъум и 9-м укъэхъугъ. Мы уахътэр охътэ бэрэчэт, зэкIэ чIым хадзагъэ щыIэмэ къызэлъэкIы, мэбагъо, ягъу пкIышъхьэ-мышъхьэхэм, хэтэрыкIхэм. Арышъ, джащ фэдэу ори, шIоу щыIэр къыбдэхъунэу тыпфэлъаIо; псауныгъэ пытэ уиIэнэу, уисэнэхьат ялые IэпэIэсагъэр къебэкIэу бэрэ Iоф рыпшIэнэу, къыопэсыгъэ уасэ сыдигъуи къыпфашIынэу, уибын дахэ, ныкъылъфыгъэхэм, уиIофшIэгъухэм уагъэразэу, шIукIэ къыбготынхэу ыкIи пстэуми тифэныкъогъэ мамырныгъэр ти Хэгъэгушхуи, тыдэрэ чIыналъи къарыуцожьынышъ, тынчэу тыпсэунэу.
Мамырыкъо Нуриет.