Мэхьанэшхо зиIэ ешIэгъухэр иIэщтых
Адыгэ Республикэм ихъулъфыгъэ командэу «Фишт-АГУ» зыфиIорэр теннис цIыкIумкIэ Урысыем икоманднэ чемпионат и Премьер-лигэ хэлэжьэн амал иIэным фэшI зэIукIэгъуитIу иIэщт.
Адыгэ къэралыгъо университетым иордэунэу Кобл Якъубэ ыцIэ зыхьырэм непэ щыкIощт ешIэгъум Адыгеим икомандэ щыIукIэщт «УГМК-Резерв» (къалэу Верхняя Пышма).
Мыекъуапэ икомандэ щешIэхэрэр: Павел Ковенкэр, Илья Шаминыр, Виталий Шумаковыр, Марат Мукамбетовыр ыкIи Александр Воронцовыр.
Зэрагъэнэфагъэу, командэхэр гъогогъуитIо зэIукIэщтых, а ешIэгъухэм язэфэхьысыжьхэм ялъытыгъэу текIоныгъэр къыдэзыхыгъэр къэнэфэщт.
Апэрэ зэIукIэгъур пчэдыжьым сыхьатыр 10-м, ятIонэрэр — мафэм сыхьатыр 5-м рагъэжьэщтых. Мы спорт лъэпкъыр зыгу рихьыхэрэр мэхьанэшхо зиIэ ешIэгъухэм яплъынхэу зэхэщакIохэм рагъэблагъэх, узэрэчIэхьащтым ыпкIэ лъыптын ищыкIагъэп.
БЗЭШlУ Асхьад.