Урысыем и Мафэ ихэгъэунэфыкIын ипэгъокIэу футбо­лымкIэ зэнэкъокъу Тэхъутэмыкъое районым щызэхащагъ.

Iофтхьабзэр гурыт еджапIэу N 1-м ифутбольнэ площадкэ щырагъэ­кIокIыгъ. Илъэс 11-м щегъэжьагъэу 13-м нэс зыныбжь кIэлэеджакIохэр текIоныгъэм ыкIи шIухьафтынхэм афэбэнагъэх. Зэнэкъокъум изэхэщакIор Тэхъутэмыкъое районым физическэ культурэмкIэ ыкIи спортымкIэ и Комитет ары.

Я 5-рэ «В» классым ис кIэлэеджакIохэр зыхэтыгъэхэ командэу «Нартым» апэрэ чIыпIэр къыдихыгъ. ЯтIонэрэ ыкIи ящэнэрэ чIыпIэхэр къахьыгъэх IэкIыб къэралыгъохэм яклубхэу «ПСЖ» ыкIи «Манчестер» зыгу рихьыхэрэм зэхащэгъэ командэхэм. Джащ фэдэу текIоныгъэм фэбэнэгъэ «Спартак» шъхьафэу хагъэунэфыкIыгъ.

ЕшIэкIо анахь дэгъухэу къыхагъэщыгъэх Ацумыжъ Ильяс, Вэрэкъо Руслъан ыкIи Тыгъужъ Алан.