Адыгэ къэралыгъо университетым икIэлэегъаджэу, усакIоу ыкIи литературнэ критикэу Кирилл Анкудиновым Урысые литературнэ премиеу «Неистовый Виссарион» зыфиIорэм ихэушъхьафыкIыгъэ шIухьафтын къыфагъэшъошагъ.

ШIухьафтын шъхьаIэр къэзылэжьыгъэр Московскэ къэралыгъо университетэу М.В. Ломоносовым ыцIэ зыхьырэм илитературнэ критикэу Виктория Шохинар ары. Кирилл Анкудиновым хэушъхьафыкIыгъэ тын къыфагъэшъошагъ.

Екатеринбург дэт шIэныгъэ тхылъеджапIэу В.Г. Белинскэм ыцIэ зыхьырэм Iофтхьабзэр щыкIуагъ ыкIи тынхэр зыфагъэшъошагъэхэм мэфэкI шIыкIэм тетэу ащаратыжьыгъэх. ШIухьафтынэу «Неистовый Виссарион» зыфиIорэр урыс литературнэ критикэу Виссарион Белинскэм ыцIэкIэ агъэнэфагъ, критикхэм афэгъэхьыгъэ ащ фэдэ литературнэ премиеу Урысыем щызэхащэрэр джырэкIэ мы зыр ары. Екатеринбург дэт тхылъеджапIэу В.Г. Белинскэм ыцIэ зыхьырэм 2019-рэ илъэсым ар ыгъэнэфагъ. Урысыем щыпсэухэу критикэм ылъэныкъокIэ творческэ гъэхъагъэхэр зышIыгъэхэр, урысыбзэкIэ тхыгъэу непэрэ литературэм фэгъэхьыгъэ IофшIагъэхэр зиIэ­хэр зэнэкъокъум хэлажьэх.

Кирилл Анкудиновыр литературнэ критик, поэт, Мыекъопэ къэлэ литературнэ объединениеу «Ошъутен» зыфиIорэм итхьамат, АКъУ-м литературэмрэ къэбар жъугъэ коммуникациехэмрэ якафедрэ идоцент, филологие шIэныгъэхэмкIэ кандидат.

Литературоведческэ ыкIи литературнэ-критическэ статьяхэр етхых, художественнэ-критическэ IофшIэгъи­шъэм ехъумэ яавтор. Журналхэу «Октябрь», «Новый мир», «Знамя», «День и ночь», «Зинзивер», «Москва», гъэзетхэу «Литературная Россия», «Литературная газета» зыфиIохэрэм ыкIи нэмыкIхэм итхыгъэхэр къащыхаутыгъэх. 2004-рэ илъэсым КIэрэщэ Тембот ыцIэкIэ агъэнэфэгъэ премием, джащ фэдэу гъэзетэу «Литературная Россия» (2005) ыкIи журналэу «Бельские просторы» (Уфа, 2010) зыфи­Iохэрэм яшIухьафтынхэм ялауреат. 2010-рэ илъэсым А.П. Чеховым июбилей ехъулIэу УФ-м культурэмкIэ и Министерствэ медаль къыфигъэшъошагъ.

Адыгэ къэралыгъо университетым ипресс-къулыкъу