Я VII-рэ Урысые Iофтхьабзэу «Забег.РФ» зыфиIорэм Мыекъуапэ хэлэжьагъ. Ар блэкIыгъэ тхьаумафэм ­къэралыгъом икъэлэ 85-мэ ащыкIуагъ. ЗэкIэмкIи нэбгырэ мини 160-м ехъумэ заушэтын амал яIагъ. Урысые Iофтхьабзэу «Забег.РФ» зыфиIорэр 2020-рэ илъэсым щегъэжьагъэу Мыекъуапэ щырагъэкIокIы. Пандемием илъэ­хъани ар зэпагъэугъэп, ау нэбгы­рэ 50 ныIэп хэлэжьагъэр. Ыпэрэ илъэс­хэм афэдэу чъэныр зикIасэхэм язэнэкъокъу республикэ ста­ди­оным ыкIи къэлэ гупчэ пар­кым ащыкIуагъ. Гъогууанэм икIыхьагъэ зэфэшъхьафыгъ: зы километр, км 5, км 10, км 21,1-рэ. Мыекъуапэ физическэ культурэмкIэ ыкIи спортымкIэ и Комитет къызэритыгъэмкIэ, Iоф­тхьабзэм нэбгырэ 1000-м ехъу хэлэжьагъ. А пчъагъэм шIомыкIынхэу зэхэщакIохэм къагъэ­нэфагъ, ау зачетым хэмытэу зызыушэты зышIоигъохэри зэ­нэкъокъум хэлэжьэнхэ алъэкIыгъ. Анахь цIыфыбэ къызэкIо­лIагъэр, нэбгырэ 475-рэ, кило­метри 5 зикIыхьагъэр ары. Зы километрэ хъурэм — нэбгырэ 400, километри 10-м — 75-рэ ахэлэжьагъ. Зэнэкъокъум игъогуонэ шъхьаIэ (км 21,1-рэ) зыщызыушэтыгъэр нэбгырэ 50. ХъулъфыгъэхэмкIэ текIоныгъэр къыдэзыхыгъэр Владимир Колосовскэр ары. ЯтIонэрэ ыкIи ящэнэрэ чIыпIэхэр къыдахыгъэх Иван Федоровымрэ Андрей Басовымрэ. Бзылъфы­гъэхэм язэнэкъокъу ащытекIуагъ Анна Фещенкэр, ятIонэрэ хъугъэ Екатерина Бутримовар, ящэ­нэрэ чIыпIэр къыхьыгъ Оксана Фесечко. ЫпшъэкIэ зигугъу къэтшIыгъэ гъогууанэхэр къэзыкIугъэхэм зэ­кIэ­ми шIэжь медальхэр ыкIи шIухьафтынхэр афагъэшъошагъэх. БЗЭШIУ Асхьад.