Къыблэ федеральнэ шъолъырым зэдегъэштэн есынымкIэ изэнэкъокъухэу къалэу Таганрог щы­кIуагъэхэм Адыгеим испортсменхэм дэгъоу зыкъыщагъэлъэгъуагъ ыкIи хагъэунэфыкIырэ чIыпIэхэр къыщыдахыгъэх.

Адыгеир турнирым къыщызгъэлъэ­гъуагъэхэр олимпийскэ резервымкIэ спорт еджапIэу В. С. Максимовым ыцIэ зыхьырэм испортсменхэр ары. Ащ зэкIэмкIи спортсмен 240-рэ ыкIи командэ 16 хэлэжьагъэх.

2015-рэ илъэсым къэхъугъэ кIалэхэм язэнэкъокъу Ярослав Стародубцевым апэрэ чIыпIэр къыщыдихыгъ. Нахьыжъхэм якуп хэтыгъэ Никита Солохиныр ящэнэрэ хъугъэ. Джыри джэрз медалитIу къахьыгъ Софья Тришинамрэ Юлия Остапенкэмрэ. Ащ нэмыкIэу купхэм язэнэкъокъу Адыгеим икомандэ ятIонэрэ ыкIи ящэнэрэ чIыпIэхэр къащыди­хыгъэх.

Зэнэкъокъум иятIонэрэ мафи респуб­ликэхэм илIыкIохэм чанэу зыкъагъэлъэгъуагъ. ТекIоныгъэр къыдахыгъ Никита Солохиным ыкIи Виктория Исаковам, Ярослав Стародубцевым ыкIи Софья Тришинам. Джащ фэдэу тиспортсменхэм джыри джэрз медалитIу къафагъэшъошагъ.

Медалэу къахьыгъэхэмкIэ Адыгеим икомандэ ятIонэрэ хъугъэ. Спортсменхэр зыгъэхьазырыгъэхэр: Урысыем изаслуженнэ тренерэу Нина Говорковар, Урысыем спортымкIэ имастерэу Иван Говорковыр, хореографхэу Эльвира Беляевар ыкIи Марина Синяевар.

БЗЭШIУ Асхьад.