Культурэр зыкIыныгъэм фэIорышIэ
Творческэ объединениеу «Ошъадэм» хэт купхэр «Тызэгъусэу ты Урысый» («Вместе мы Россия») зыфиIорэ фестивалэу Дагъыстан щыкIуагъэм жъоныгъуакIэм ыкIэм хэлэжьагъэх.
[caption id="attachment_133849" align="aligncenter" width="800"] Сурэтыр: «Ошъад».[/caption]
УФ-м культурэмкIэ и Министерствэрэ лъэпкъ творчествэм и Урысые къэралыгъо Унэу В. Поленовым ыцIэ зыхьырэмрэ кIэщакIо зыфэхъугъэхэ Iофтхьабзэм хэгъэгум и Къыблэ ыкIи и Темыр шъолъырхэр зэфищагъэх.
АР-м Лъэпкъ культурэмкIэ и Гупчэ иIэпыIэгъукIэ «Ошъадэр» фестивалым хэлэжьэнэу хъугъэ. Адыгеим, Осетием, Чэчэным, ДНР-м, Ставрополь краим, ежь Дагъыстан яорэдыIо-къэшъокIо купхэр Iофтхьабзэм хэлэжьагъэх. «Ошъадэм» ипащэу, АР-м изаслуженнэ артисткэу, Чэчэн Республикэм искусствэхэмкIэ изаслуженнэ IофышIэшхоу Едыдж Викторие къызэрэтфиIотагъэмкIэ, къызэфэсыгъэ купхэм апэрэ мафэм Дербент концертышхо къыщатыгъ. Iофтхьабзэм хэлэжьагъ Москва къикIыгъэ хьакIэу лъэпкъ творчествэм и Унэу В.Поленовым ыцIэ зыхьырэм ипащэу
Тамара Пуртовар. Адыгэ лъэпкъ къашъохэм яансамблэу «Синдикэм» «Удж-Сэндракъыр» къышIыгъ, фольклор-этнографическэ купэу «Ащэмэзым» ХьапакIэ иорэд къыIуагъ.
[caption id="attachment_133850" align="aligncenter" width="800"] Сурэтыр: «Ошъад».[/caption]
«Урысыер — лъэпкъыбэ зыщыпсэурэ къэралыгъу. ЫкIи непэ тизыкIыныгъэ хэзгъахъохэрэм ащыщ лъэпкъ культурэ зэфэшъхьафхэр, ахэм ябаиныгъэ, яхэушъхьафыкIыгъэ. Лъэпкъ шэн-хабзэхэм якъэухъумэн мыщ фэдэ фестивальхэр фэIорышIэх. Нахь тызэрэшIэным, тызэхэхьаным иамалхэр ахэм къытфызэIуахы. АдыгэхэмкIэ тикультурэ бай ятэгъашIэ, ятэгъэлъэгъу, нэмыкI лъэпкъхэр зэрыгушхорэ гушъхьэ баиныгъэр нэрылъэгъу къытфэхъу. Тызэкъотмэ тызэрэлъэшыр нафэ къытфашIы», — хигъэунэфыкIыгъ Едыдж Викторие.
[caption id="attachment_133851" align="aligncenter" width="800"] Сурэтыр: «Ошъад».[/caption]
Фестивалым иятIонэрэ мафэ Махачкала игупчэу Лениным ыцIэ зыхьырэм щыкIуагъ. «Къыблэ къушъхьэхэм къащыублагъэу темыр хыорхэм анэс!» цIэу зыфашIыгъэ телелъэмыджым Махачкаларэ Мурманскэрэ зэрипхыгъэх. Сыбыр иорэдыIо-къэшъокIо купхэр ащ хэлэжьагъэх. Къыблэ ыкIи Темыр шъолъырхэм якультурэ икъэгъэлъэгъуапIэу Iофтхьабзэр хъугъэ. Чэчэн къашъор «Синдикэм» иартистхэм къашIыгъ. Урысыем и Къыблэ щыпсэурэ лъэпкъхэм якультурэ ыкIи яшэн-хабзэхэм фэгъэхьыгъэ Гала-концертымкIэ фестивалыр зэфашIыжьыгъ. Хэлэжьагъэхэм зэкIэми дипломхэр къаратыжьыгъэх.
Iоныгъом и 15-м ансамблэу «Синдикэр» зызэхащагъэр илъэс 15 зэрэхъурэр хигъэунэфыкIыщт. Едыдж Викторие къызэриIуагъэмкIэ, ансамблэм хэтхэм ащ игъэкIотыгъэу зыфагъэхьазыры. Купыр зэхэщэгъакIэ зэхъум зыщырагъэжьэгъэгъэ концерт программэм щыщ пычыгъохэр, непэрэ мафэм якъэгъэлъэгъонхэр зынэсыгъэ лъэгапIэхэр къэзыушыхьатырэ хореографие композициехэр зэхэтэу мэфэкIышхо агъэхьазыры. Ар зыщырекIокIыщт чIыпIэм ыцIэ Едыдж Викторие къыIуагъэп, «Синдикэр» зикIасэхэм ар шIухьафтын шъыпкъэу афэхъунэу мэгугъэ. Концертым адыгэ шхыныгъохэр ыкIи IэпэIасэхэм якъэгъэлъэгъонхэр зэрэхэтыщтхэр хигъэунэфыкIыгъ. Культурэр лъэпкъыр къызкъонэщт баиныгъ.
Тэу Замир.
Сурэтхэр: «Ошъад».