Адыгэ къэралыгъо университетым лъэпкъ къашъомкIэ иансамблэу «Нартыр» «Урысыем истуденческэ гъатх» зыфиIорэ фестивалым илауреат хъугъэ.

Я XXXI-рэ Урысые фестивалэу «Урысые студенческэ гъатхэм» илъэпкъ финал Пермь щыкIуагъ ыкIи хэгъэгум гъэсэныгъэмкIэ иучреждение 750-мэ ялIыкIохэр ыугъоигъэх. Финалым студент нэбгырэ мини 3,5-рэ хэлэжьагъ, ахэм зэнэкъокъу IофшIэгъэ мин 1,5-рэ осэшIмэ апашъхьэ къаралъхьагъ, зыщызэнэкъокъугъэхэр лъэныкъо 54-рэ хъущтыгъэ. Зэфэхьысыжьхэм къызэрагъэлъэгъуагъэмкIэ, Адыгэ къэралыгъо университетым илъэпкъ къэшъокIо ансамблэу «Нартым» апэрэ чIыпIэр къыдихыгъ, ащ иартисткэу Мыгу Данэ фестивалым илауреат хъугъэ.

Шъолъыр едзыгъом текIоныгъэр къыщыдэзыхыгъэ студент 14 Пермь кIогъагъэх. АКъУ-м истудентхэмрэ творческэ куп­хэмрэ къэшъонымкIэ, лъэпкъ Iэмэ-псымэхэм къягъэIогъэнымкIэ, орэд къэIогъэнымкIэ заушэтыгъ. «Нартым» къышIыгъэ «ЗэфакIомрэ» «Пшъэшъэ къа­шъомрэ» анахь дэгъоу алъытагъэх. «Тыргъэтао итхыдэ» къэзышIыгъэр Мыгу Дан ары.

АКъУ-м илъэпкъ къэшъокIо ансамблэу «Нартыр» мызэу, мытIоу фестивалэу «Урысыем истуденческэ гъатх» зыфиIорэм текIоныгъэр къыщыдихыгъ. 2017-рэ илъэсым анахь творческэ куп дэгъоу къыхагъэщыгъагъ. Ансамблэм ипащэр АР-м культурэмкIэ изаслуженнэ IофышIэу Шагудж Казбек.

1992-рэ илъэсым къыщегъэ­жьагъэу фестивалыр УФ-м ишъолъырхэм ащызэхащэ. Гъэ къэс программэм студент 1500000-рэ хэлажьэ, ахэр гъэсэныгъэ учреждение 1200-мэ ялIыкIох.

Фестивалым икIэщэкIуагъэх УФ-м шIэныгъэмкIэ ыкIи апшъэ­рэ гъэсэныгъэмкIэ и Министерствэ, Пермь краим и Правительствэ, Урысыем и НыбжьыкIэхэм я Союз ыкIи нэмыкIхэр.

Адыгэ къэралыгъо университетым ипресс-къулыкъу