Анахь лъэшэу анаIэ зытырагъэтыхэрэм ащыщ
Урысые Федерацием и Тхьаматэ игуадзэу Татьяна Голиковам пэIудзыгъэ шIыкIэм тетэу тыгъуасэ зэхищэгъэгъэ зэIукIэр зыфэгъэхьыгъагъэр лъэпкъ проектэу «Культурэр» 2023-рэ илъэсым гъэцэкIагъэ зэрэхъущтым иIофыгъохэр ары. МыщкIэ къэгущыIагъ УФ-м культурэмкIэ иминистрэу Ольга Любимовар.
Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу зэIукIэм хэлэжьагъ АР-м иминистрэхэм я Кабинет и Тхьаматэу КIэрэщэ Анзаур. Джащ фэдэу Адыгеим ыцIэкIэ Iофтхьабзэм хэлэжьагъэх АР-м культурэмкIэ иминистрэу Аулъэ Юрэ, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саниет.
Лъэпкъ проектэу «Культурэм» къыдилъытэрэ пшъэрылъхэр гъэцэкIагъэ хъунхэм пае Адыгэ Республикэм культурэмкIэ и Министерствэ республикэ проектищ зэхигъэуцуагъ, культурэм иорганизациехэр агъэкIэжьых ыкIи зэтырагъэпсыхьажьых.
Лъэпкъ проектэу «Культурэр» зыфиIоу 2023-рэ илъэсым телъытагъэм республикэмкIэ сомэ миллион 703,2-рэ пэIуагъэхьащт. Контрактациер зэрэхъурэр проценти 100. 2023 — 2024-рэ илъэсхэм къыдалъытэрэ Iофтхьабзэхэм япхырыщын а мылъкур пэIуагъэхьащт. Концерт залэу «Налмэсым» изэтегъэпсыхьан аублагъ, джащ фэдэу Мыекъуапэ культурэм ихэхъоныгъэкIэ Гупчэ щашIы. ПсэупIэу Тульскэм искусствэхэмкIэ кIэлэцIыкIу еджапIэу дэтым игъэкIотыгъэ гъэцэкIэжьын IофшIэнхэр рашIылIэщтых, джащ фэдэу искусствэхэмкIэ республикэ кIэлэцIыкIу еджэпIитIу зэтырагъэпсыхьащт. Къуаджэхэу ХьакIэмзые, Къэбэхьаблэ ыкIи къутырэу Саратовскэм культурэм иунэхэу адэтхэр джащ фэдэу игъэкIотыгъэу агъэцэкIэжьыщтых.
Къутырэу Чернышевым культурэм и Унэу дэтыр гъэцэкIэжьыгъэным ыкIи къуаджэу Хьалъэкъуае культурэм и Унэу щашIыщтым апэIухьащт мылъкур къыдалъытэгъах. Экономикэм фытегъэпсыхьэгъэ еджэпIитIу ашIыщт, музеи 6 джырэ уахътэм диштэрэ оборудованиемкIэ зэтырагъэпсыхьащт, къуаджэу Фэдз дэт тхылъеджапIэри джащ фэдэу нахь зэтырагъэпсыхьащт.
Республикэ проектэу «Творческэ цIыфхэр» зыфиIорэр гъэцэкIагъэ хъуным сомэ миллиони 2,9-рэ къыфыхагъэкIыгъ. А мылъкур зыпэIуагъэхьащтыр творческэ Iофтхьабзэхэр, къэгъэлъэгъонхэр, фестивальхэр кIэлэцIыкIухэм апае зэхэщэгъэнхэр ары. Мы проектым ишIуагъэкIэ творческэ коллективхэм, культурэм иучреждениехэу къуаджэхэм адэтхэм, музыкальнэ, театральнэ ыкIи изобразительнэ искусствэм алъэныкъокIэ творческэ проект анахь дэгъухэм IэпыIэгъу аратыщт.
Республикэ проектэу «Цифровая культура» зыфиIорэм диштэу порталэу «Культура.РФ» зыфиIорэр, Лъэпкъ электрон тхылъеджапIэр, УФ-м имузейнэ фонд и Къэралыгъо каталог, социальнэ проектэу «Пушкинская карта» зыфиIорэр къызфагъэфедэнхэмкIэ амалхэр яIэщтых. Цифрэ платформэу «Артефакт» зыфиIорэм тетэу проектхэм язэшIохын тегъэпсыхьэгъэ лъэIу тхылъхэу зэнэкъокъум хэлэжьэнхэм пае къатыгъэхэм музеи 5 ахэлэжьагъ ыкIи музей пэпчъ экспонат 40 къырихьылIэнэу ары.
«Адыгеим и ЛIышъхьэу КъумпIыл Мурат культурэм ихэхъоныгъэ лъэшэу ынаIэ тырегъэты. Тэ пшъэрылъэу тиIэр лъэпкъ проектым тегъэпсыхьагъэу агъэнэфэгъэ Iофтхьабзэхэр зэкIэ зэшIотхынхэр, ахэм шIуагъэу къатырэм зыкъегъэIэтыгъэным икъоу тылъыплъэныр ары», —къыхигъэщыгъ Адыгэ Республикэм иминистрэхэм я Кабинет и Тхьаматэу КIэрэщэ Анзаур.
АР-м и ЛIышъхьэ ипресс-къулыкъу