Даур Къадырбэч ящэнэрэ чIыпIэр къыдихыгъ
Мыекъуапэ щыщ Даур Къадырбэч тхэквондомкIэ дунаим ичемпионат хэлэжьагъ ыкIи ящэнэрэ чIыпIэр къыщыдихыгъ. ТхэквондомкIэ Дунэе федерациер зызэхащагъэр илъэс 50 зыщыхъурэм ехъулIэу тиспортсмен джэрз медаль къызэрихьыгъэм лъэшэу тигъэгушIуагъ. Азербайджан икъэлэ шъхьаIэу Баку щыкIогъэ зэнэкъокъухэм къэралыгъуи 144-м ялIыкIохэр хэлэжьагъэх. Къ. Даурым «нейтральнэ статус» иIэу мыщ зыщиушэтыгъ. Тиспортсмен аIукIагъ Францием, Японием, Словением, Тунис ыкIи Сербием къарыкIыгъэхэм. Сербием илIыкIо закъу тиспортсмен къытекIон зылъэкIыгъэр, ащ къыхэкIыкIэ Къадырбэч ящэнэрэ чIыпIэр къыдихыгъ ыкIи Урысыер къэзыгъэлъэгъогъэ хъулъфыгъэхэмкIэ мы зыр ары медаль къызыфагъэшъошагъэр.
Тиспортсменрэ ащ итренерэу Василий Есинымрэ къафэгушIуагъ Адыгеим и ЛIышъхьэу КъумпIыл Мурат.