Нэбгырэ 50-мэ заушэтыгъ
Физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм итхьамафэ Мыекъуапэ щэкIо. Ащ къыдыхэлъытагъэу апэрэ мэфитфым Адыгеим щыпсэурэ нэбгырэ 50-мэ шапхъэхэм ятынкIэ заушэтыгъ. ЗэхэщакIохэм зэрагъэнэфагъэу шапхъэхэр зыты зышIоигъохэр зэкIэ республикэу стадионэу «Зэкъошныгъэм» къекIолIэнхэ, пчэдыжьми пчыхьэми заушэтын алъэкIыщт.
ЖъоныгъуакIэм комплексым къыдыхэлъытэгъэ шапхъэхэр зытымэ зышIоигъоу зыкъэзыгъэлъэгъуагъэхэр илъэси 6 — 17 зыныбжьхэр арых. Мыхэм анахьыбэм аныбжь илъэси 6 — 9-м шIокIырэп. КIэлэцIыкIухэр спортым пылъых ыкIи республикэм икъэлэ шъхьаIэ щызэхащэрэ физкультурэ-спорт Iофтхьабзэхэм чанэу ахэлажьэх.
Шапхъэхэр зэрифэшъуашэу зытыхэрэм дышъэ, тыжьын ыкIи джэрз бгъэхалъхьэхэр аратыщтых.
2023-рэ илъэсым мэлылъфэгъум и 1-м щегъэжьагъэу физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм хэлажьэхэрэм аныбжь елъытыгъэу куп 18-у зэтыраутыгъэх, ыпэкIэ ахэм япчъагъэ 11 хъущтыгъ.