Нурет игущыIэ Iэзэгъу
«ГущыIэ дахэм блэр гъуанэм къырещы» амышIэу аIуагъэп тинахьыжъхэм. Дэгъум, дахэм къымыубытын псэ зыпыт гори щыIэп. Ар анахьэу гукIэ зэхэзышIэхэрэр творческэ цIыфхэр ары.
Дысыгъэ-къаигъагъэкIэ хэти уузэнкIын, имыхъун зыдебгъэшIэжьын плъэкIыщтэп. Ау акъылыгъэ хэлъэу, цIыфыгъэ пэбгъохымэ, пфэмыгъэсэни, къэмыуфэни щыIэпщтын.
Ар зэхишIапэу тхакIоу Хъунэго Нурет изы усэ тхылъ «ГущыIэр Iэзэгъу» цIэу фишIыгъ. Щэч хэлъэп, гущыIэр кIочIэшхо зыхэлъ: ащ гуауи, жъалымыгъи, нэикI-IуикIыгъэ дысыгъи хэлъын ылъэкIыщт, гущыIэр ежь къэзыIорэм ыгу, ышъо атешIыкIыгъ сыдигъуи, ау акъыл зиIэмкIэ, нафэр гущыIэр нэфэгъэ-шъыпкъагъэр хэлъмэ, зафэу, фабэмэ, Iэзэгъу инэу зэрэщытыр ары.
Адыгэхэр ижъыкIэ шэн-хэбзэ дэгъухэм арыгъуазэхэу, жэм лъэшэу фэсакъхэу, ухъумагъэхэу щытыгъэх. Шъыпкъэ, джырэ уахътэм зэкIэ урыси, адыги, ермэли, къэндзали, нэмыкIи, къечъэкI-къезэрэфэкIым хэтых, нахьыбэр Iоные-шIэные дэдэ хъугъэ. ШIэныгъэ-гъэсэныгъэр, пIуныгъэр, а зэкIэ зэрыт тхылъыр IэкIыб зыпшIырэм, культурэр ыкIи зэкIэ щыIэныгъэ лъэныкъохэр къэланлэхэба.
Хъунэго Нурет Исхьакъ ыпхъур Красногвардейскэ районым ит къуаджэу Джамбэчые мэкъуогъум и 5-м, 1930-рэ илъэсым аужырэ сабыеу бын Iужъу зэгурыIом къыщыхъугъ. Исхьакъ ыкъо-ыпхъухэр зэкIэ ригъэджэнхэр, цIыфышIу хъунхэр фызэшIокIыгъ. Нурети Адыгэ кIэлэегъэджэ училищыр 1955-рэ илъэсым, Адыгэ къэралыгъо кIэлэегъэджэ институтым филологиемкIэ ифакультет 1960-м къыухыгъэх. 1961-рэ илъэсым щегъэжьагъэу пенсием окIофэ, хэку гъэзетэу «Социалистическэ Адыгеим», «Адыгэ макъэм» зэдзэкIакIоу Iоф щишIагъ, ащкIэ лъэпкъ журналистикэм иIахь хилъхьагъ, ащ изакъоп, икIэсэ иныдэлъфыбзэкIэ иныбжьыкIэгъум къыщегъэжьагъэу игупшысэ къыриIотыкIыныр икIэсагъ.
Ытхыхэрэр 1951-рэ илъэсым щегъэжьагъэу хиутыщтыгъэх. «Гъэтхэ къэгъагъэхэр» зыфиIоу тхэкIо куп зэдатхыгъэм Нурет иусэхэр къыдэхьагъэх, ащ ыужым «ГущыIэр Iэзэгъу» ыIоу усэхэмрэ рассказхэмрэ зыдэтхэр (1992), «Гупшысэ нэфхэр» (2003) ацIэу тхылъхэр къыдигъэкIыгъэх. Нурет иусэхэр, рассказхэр, поэмэхэр хэку гъэзетхэм ыкIи журналхэм къарыхьэщтыгъэх. Иусэхэм ащыщхэр композиторхэм орэдышъомэ аралъхьагъэх. Хъунэго Нурет Урысые Федерацием итхакIохэм я Союз 1998-рэ илъэсым къыщыублагъэу хэт.
Ау ипоэзие зэфэдэкIэ фэбагъэр, шъэбагъэр, дэхагъэр къыхэщы, иадыгэ лъэпкъ илъэпIэгъэ-Iушыгъэ, иIэдэб ин, инэхъой, игубзыгъагъэ, адыгэ бзылъфыгъэм иобраз — ежь Янэ иобразкIэ, щыIэныгъэм я ХХ-рэ лIэшIэгъум икъежьапIэм ыкIи игурытым шIокIэу бзылъфыгъэм чIыпIэу обществэм щыриIагъэр иусэхэм ыкIи ипрозэ къащыриIотыкIыгъ. Ныр — онджэкъ машIом иухъумакIоу, унагъор зэрищхэу, кIиугъуаеу, сабый щхы макъэм гушIуагъор къыдакIоу, пшъыр зыщыщыр ымышIэу, нэф зышъэу, чэщ кIахэ охъуфэкIэ янэ хьалэл-хьалэлэу, гущыIэ лые ыжэ къыдэмыкIэу, ибын-унагъо, илъфыгъэхэм, унагъом ипкъэоу — шъхьэгъусэм, фэлъэкIырэр афишIэу игъашIэ зэрэрихыгъэр Нурет Ным фэгъэхьыгъэ усэмкIэ кIэгъэзынчъэу къыриIотыкIыгъ.
ЛъэкIэн-тхьакIэни, гъомылэпхъэ зехьани, пщэрыхьан мыухыжьри, сабый пIун-лэжьынри, нахь ин зэхъухэми, ыкъо-ыпхъухэм, шъхьэгъусэм ыпсэ аIуилъхьэу зэрэщыIагъэр усэ сатырхэмкIэ ащ нэм къыкIигъэуцуагъ. Нурет нэкIэ ылъэгъурэм нахь бэжь гукIэ зэхишIэщтыгъэр. Адыгэ шэн-хэбзэ дахэхэу сабый кушъэхапхэр, лъэтегъэуцор, адыгэ нысэщэ джэгур, а зэкIэм ахэлъ-ахэсыр, этнограф шъыпкъэу, тарихъыр зышIэу, итворчествэ щигъэунэфыгъэх. Хъунэго Нурет итхылъхэр зэпырыбгъазэхэ зыхъукIэ, тхакIом иадыгабзэ хъуаоу ыбгъэ къызэрэдэкIыщтыгъэр, ытхырэ усэр, поэмэр е рассказхэр ыгу щыпхырищыпагъэхэу, тIыргъуагъэхэу зэрэщытхэм гу лъыотэ. Нурет иусэ-поэмэу адыгэ тхэкIо цIэрыIоу, ышыпхъу нахьыжъэу Зузэ ишъхьэгъусэгъэ КIэрэщэ Тембот фэгъэхьыгъэр, нэмыкI поэмэу Шэуджэн Мурат — кIэлэ ныбжьыкIэу Абхъазым ишъхьафитныгъэ (грузинхэм зао къызарашIылIэм) зыпсэ фэзытыгъэм, нэу зыкъо зыгъэтIылъыгъэм кIэхэкIэу, ыщэчырэр гучIэм итIысхьэхэу къызэритыгъэхэр, ирассказхэм апхырыкIырэ гупшысэм ясюжет гъэшIэгъонхэр тхакIоу Хъунэго Нурет усэн-тхэн IэпэIэсагъэу хэлъыгъэр къаушыхьаты.
Нурет псаузэ, сыIукIэнэу, сыфэтхэнэу имэфэкI инкIэ синасып къыхьыгъ, зы адыгэ бзылъфыгъэ зэкIэупкIагъэу, зыфэсакъыжьэу, шIум фэлажьэу иилъэсхэр къыхьыгъэх, унэгъо зэгурыIо иIагъ, щыIэныгъэр икIэсагъ, ыпхъурэ ыкъорэ (ыпIугъэхэм) яхъяри къылъэгъугъ, творческэ гукъэбзагъэр ынапэу щыIагъ, жъоныгъуакIэм и 5-м къэхъугъ. Нурет адыгэ тхыгъэ литературэм пасэу, Натхъо Долэтхъан ыуж, къыхэхьэгъэ тхакIу, ышым ыпхъоу Хъунэго Саиди усакIо, тхакIо, драматург. Мыщ дэжьым къыхэзгъэщымэ сшIоигъор, КIэрэщэ Зузэ (Хъунэго Исхьакъ ыпхъугъ, Нурет ышыпхъу нахьыжъыгъ) тхэкIошхоу КIэрэщэ Тембот ягуащэ зэхъум, шъхьэгъусэм икIыхьэ-кIухьэ ригъэ-къоу дыщыIагъ, унэгъо дахи зэдашIагъ. Ау ежь Зузэ ышъхьэкIэ акъыл-зэчый гъэнэфагъэу хэлъыгъэр къызынэфагъэр Тембот зыщымыIэжь уж, гъэзетэу «Адыгэ макъэм» бэрэ къатхэу, темэ гъэшIэгъонхэр къыIэтэу ыкIи иусэхэр, прозэр зыдэт тхылъэу «Усэм ымакъэ зэхэсэхы» зыфиIорэр къызыдегъэкIыр ары. А зэкIэм къаушыхьаты Хъунэго Исхьакъ ыкъо-ыпхъухэм акъыл-гулъытэ ин, зэчый гъэнэфагъэ зэрахэлъыгъэр.
Мамырыкъо Нуриет.