Сэнаущыгъэ зыхэлъ кIэлэцIыкIухэр щызэрэугъоигъэх
Адыгэ къэралыгъо университетым иеджапIэу «Горная легенда» зыфиIорэм 2023-рэ илъэсым телъытэгъэ Гъэмэфэ спорт еджапIэр къыщызэIуахыгъ.
Мыщ фэгъэхьыгъэ мэфэкI зэхахьэу щыIагъэр гъэшIэгъонэу, кIэлэцIыкIухэм агу къинэжьынэу рагъэкIокIыгъ. Кушъхьэфэчъэ спортымкIэ, теннис цIыкIумкIэ ыкIи спорт къашъохэмкIэ сэнаущыгъэ зыхэлъ спортсмен ныбжьыкIэхэм къафэгушIуагъэх мы спорт лъэпкъхэмкIэ гъэхъэгъэшIу зиIэ лIыкIохэр, хьакIэхэр.
КIэлэцIыкIухэр нахь нэIуасэ зэфэхъунхэм фэшI Iофтхьэбзэ гъэнэфагъэхэр афызэхащагъэх. ЕджапIэр къызызэIуахыгъэ мэфиплIым къыкIоцI кIэлэцIыкIухэр ныбджэгъу зэфэхъугъэх, лагерыр зыдэщыIэ Мыекъопэ районым ичIыпIэ дахэхэр зэрагъэлъэгъугъэх, тренировкэхэр ашIыгъэх.
КIэлэцIыкIухэм джыри мэфабэ апэ илъ, а уахътэм ахэр рагъэджэщтых, спорт тестированиер арагъэкIущт, агъэсэщтых ыкIи Iофтхьэбзэ гъэшIэгъоныбэмэ ахэлэжьэщтых. ЗэхэщакIохэм зэралъытэрэмкIэ, шъхьадж къыхихыгъэ спорт лъэпкъым гъэхъагъэхэр щишIынхэр, кIэлэцIыкIухэм Гъэмэфэ еджапIэр шIукIэ агу къинэжьыныр ары анахь пшъэрылъ шъхьаIэу щытыр. Спорт сменэр мэкъуогъум и 18-м нэс кIощт.