ФутболымкIэ Урысыем ипервенствэ иятIонэрэ лигэ щешIэрэ Мыекъопэ «Зэкъошныгъэр» тикъалэ щыIукIэщт Махачкала икомандэу «Легионым».

Ащ удешIэныр къины, сыда пIомэ финал едзыгъом ешIэгъуи 4-у щыриIагъэм текIоныгъи 4 къыщыдихыгъ, ифутболистхэм къэлапчъэм Iэгуаор гъогогъу 11 дадзагъ, къашIудадзагъэр зы ныIэп.

Мыекъуапэ икомандэ зы текIоныгъэ къыдихыгъ, ешIэгъуищыр шIуахьыгъ. Ставрополь икомандэу «Динамэр» 1:0-у къытекIуагъ. А ешIэгъум тифутболистхэу Раджаб Гусенгаджиевымрэ Хьасанэкъо Амиррэ карточкэ плъыжьхэр къарагъэлъэгъугъэх, къыкIэлъыкIощт зэIукIэгъум хэлэжьэщтхэп. А гумэкIыгъохэм командэр зэрапхырыкIыщтым, ащкIэ тренер шъхьаIэу Беслан Аджинджал къыугупшысыщтым уалъыплъэныр гъэшIэгъоныщт.

Джырэ уахътэм купэу зыхэтым «Зэкъошныгъэм» я 4-рэ чIыпIэр щиIыгъ, первенствэм изэфэхьысыжьхэр зэрэпсаоу пштэмэ я 10-м щыт. Тикомандэ «Легионым» зыIукIэщтыр мэкъуогъум и 4-р ары, Мыекъуапэ щыкIощт ешIэгъур мафэм сыхьатыр 4-м ра­гъэжьэщт.