НэбгыриплI финалым ихьагъ
ДзюдомкIэ Урысыем ичемпионат ифинал Адыгэ къэралыгъо университетым истуденткиплI ихьагъ.
Къыблэ федеральнэ шъолъырым изэнэкъокъоу жъоныгъуакIэм и 25-м щегъэжьагъэу и 27-м нэс къалэу Ермэлхьаблэ щыкIуагъэм изэфэхьысыжьхэмкIэ типшъашъэхэр Урысыем ичемпионат ифинал хэлэжьэнхэу фитыныгъэ къыдахыгъ. Урысыем ишъолъыри 7-мэ къарыкIыгъэ спортсмен 205-рэ турнирым хэлэжьагъэх, ахэм ащыщэу 30-р Адыгеим илIыкIох.
Адыгэ Республикэм икомандэ хъулъфыгъэ 24-рэ ыкIи бзылъфыгъи 6 хэтыгъ. Зэфэхьысыжьхэм къызэрагъэлъэгъуагъэмкIэ, Адыгэ къэралыгъо университетым истуденткэу Мыгу Миланэрэ мы апшъэрэ еджапIэм и Мыекъопэ къэралыгъо гуманитар-техническэ колледж щеджэрэ Виктория Пылевамрэ тыжьын медальхэр къафагъэшъошагъэх. Джащ фэдэу студенткэхэу Татьяна Шатало- вамрэ ХьакIэко Данэрэ ящэнэрэ чIыпIэр къыдахыгъ. Пшъашъэхэм Адыгэ къэралыгъо университетым физическэ культурэмкIэ ыкIи дзюдомкIэ и Институт зыщагъасэ.
— Анапэ, Волгоград тащыIагъ, зэнэкъокъубэмэ тахэлэжьагъ. Ау мыр зэкIэмэ анахь шъхьаIэу щытыгъ. Къыблэ федеральнэ шъолъырым ихэшыпыкIыгъэ командэ тыхэфэнышъ, ащ ыуж Урысыем ичемпионат тыхэлэжьэнымкIэ фитыныгъэ къыдэтхын фэягъ. А пшъэрылъыр типшъашъэхэм дэгъоу агъэцэкIагъ, — къыIуагъ спортсменкэхэм ятренерэу, АКъУ-м физическэ культурэмкIэ ыкIи дзюдомкIэ и Институт икафедрэ икIэлэегъэджэ шъхьаIэу Нэпсэу Бислъан.
Джащ фэдэу мэкъуогъум ыкIэм Ермэлхьаблэ щыкIощт Урысыем ичемпионат зыныбжь илъэс 21-м шIомыкIыгъэхэр хэлэжьэщтых, ащи тиспортсменкэхэм зыщаушэтыщт. Тренерым къызэриIуагъэмкIэ, хагъэунэфыкIырэ чIыпIэхэр къыдахынхэмкIэ ахэм амалышIухэр яIэх.
ДзюдомкIэ Урысыем ичемпионат ифинал 2023-рэ илъэсым Iоныгъом и 26-м щегъэжьагъэу чъэпыогъум и 2-м нэс къалэу Кемерово испорткомплексэу «Кузбасс-Арена» зыфиIорэм щыкIощт.