Апэрэ Адыгэ театральнэ техникумыр къалэу Краснодар къызщызэIуахыгъэр жъоныгъокIэ мазэм илъэс 90-рэ хъугъэ. Лъэпкъым ар къыдэхъуным зиIахьышIу хэзылъхьагъэр ыкIи ащ ипащэу агъэнэфэгъагъэр Цэй Ибрахьим Шъалихьэ ыкъор ары.

Адыгэ театральнэ техникум тиIэ зыхъу­гъагъэр 1933-рэ илъэсыр ары. А лъэхъа­ным Ибрахьимэ шIэныгъэ зэфэшъхьафхэр зэзыгъэгъотыгъэу, общественнэ Iофыгъо­хэм апылъэу, ыцIэ чыжьэ Iугъэу, тхакIоу, драматургэу щытыгъ.

Революцием ыпэкIэ итхыгъэхэр къыхаутыхэу рагъэжьэгъагъ. Краснодар апэрэу ипьесэ зыщагъэуцум ыуж Москва идраматургхэмрэ икомпозиторхэмрэ яобществэ хагъэхьэгъагъ.

Илъэс зэкIэлъыкIохэм драмэу «Къо­кIас», рассказэу «Фатимэ инасып», пьесэу «Фэмый», нэмыкIхэри ытхыгъэх.

Ибрахьим техникумым ипэщэ къодыягъэп, ащ ныбжьыкIэхэр ригъаджэщтыгъэх, режиссерыгъ ыкIи актерыгъ. Адыгэ театрэм Iоф щызышIэщт кIалэхэмрэ пшъашъэхэмрэ IофшIэным фигъасэщтыгъэх.

Ар цIыф Iушыгъ, гъэсэныгъэ дэгъу иIагъ, урысыбзэр, украинабзэр, къырым-татарыбзэр, тыркубзэр ышIэщты­гъэх. Адыгэ тхакIохэм къаIэкIэкIырэ тхыгъэхэм афэшъхьафэу урыс литературэр зыгъэбаигъэхэ Н.В. Гоголь, И.А. Крыловым, Д. Беднэм, Н.А. Островскэм, С.Я. Маршакырэ К.И. Чуковскэмрэ атхыщтыгъэхэр адыгабзэкIэ зэридзэкIыжьыщтыгъэх.

Я 30-рэ илъэсхэм агъэуцугъэ пьесэхэр адыгэ къуаджэхэм къащагъэлъагъохэу рагъэжьэгъагъ, цIыфхэр ахэм къагъэущыщтыгъэх ыкIи ашIогъэшIэгъоныгъэх. Адыгеим профессиональнэ лъэпкъ театрэ иIэ зэхъум Цэй Ибрахьим ыгъэсэгъэ актерхэр ары Iоф щызышIэнэу езгъэжьэгъагъэхэр.

Илъэсыбэ текIыгъэу Адыгэ Рес­­- пуб­ликэм и Лъэпкъ театрэ Ибрахьимэ ыцIэ фаусыгъ. Ар адыгэ лъэпкъым ыгу илъыщт, адыгэхэм ятеатральнэ искусствэ ылъапсэу ыгъэчъыгъэр цIыфхэм ащы­гъупшэщтэп.

(Тикорр.).