Урысые литературнэ-критикэ шIухьафтынэу «Неистовый Виссарион» зыфиIорэм 2023-рэ илъэсымкIэ икIэух нэбгырэ 13 хэхьагъ, ахэм ащыщ Адыгэ къэралыгъо университетым филологиемкIэ ифакультет икIэлэегъаджэу Кирилл Анкудиновыр.ШIухьафтынэу «Неистовый Виссарион» зыфиIорэр урыс литературнэ критикэу Виссарион Григорьевич Белинскэм ыцIэкIэ агъэнэфагъ, критикхэм афагъэшъуашэ. Ар 2019-рэ илъэсым

Свердловскэ хэку универсальнэ научнэ тхылъеджапIэу В. Г. Белинскэм ыцIэ зыхьырэм ишIоигъоныгъэ къыпкъырыкIыгъ.

СэнэхьатымкIэ къахэщыгъэхэм илъэс къэс мы шIухьафтыныр араты. ОсэшI купым хэтхэм критикэ зыхэлъ тхыгъэ анахь дэгъухэм, зигъо Iофыгъохэр къызыщыIотэгъэ джырэ литературэ къиIотыкIынхэм, рецензиехэм яавтор анахь дэгъухэр къыхахых. АхэмкIэ IофшIэгъэ анахь дэгъухэр зыдэт тхылъ къыдагъэкIы. ТекIоныгъэр къыдэзыхыгъэхэу ыкIи 2023-рэ илъэсымкIэ шIухьафтыныр зэратыщтхэр мэфэкI зэхахьэу мэкъуогъум и 5-м Екатеринбург щыкIощтым къыщынэфэщтых, щагъэшIощтых.

Кирилл Анкудиновыр литературнэ критик, усакIо, Мыекъопэ къэлэ литературнэ объединениеу «Ошъутенэм» итхьамат, АКъУ-м литературэмрэ коммуникацие жъугъэхэмрэкIэ икафедрэ идоцент, филологие шIэныгъэхэмкIэ кандидат. Литературоведческэ ыкIи литературнэ-критическэ статьяхэр етхых, художественнэ-критическэ IофшIэгъи 100-м ехъум яавтор. Литературнэ критикэмкIэ ытхыхэрэр журналхэу «Октябрь», «Новый мир», «Знамя», «День и ночь», «Москва», гъэ­зетхэу «Литературная Россия» ыкIи «Литературная газета» зыфиIохэрэм, нэмыкIхэми къащыхиутыгъэх.

Т. М. КIэращэм ыцIэкIэ агъэнэфэгъэ литературнэ премием (2004), гъэзетэу «Литературная Россия» (2005) ыкIи журналэу «Бельские просторы» (Уфа, 2010) яшIухьафтынхэм ялауреат. 2010-рэ илъэсым А. П. Чеховым июбилей медаль къыфагъэшъошагъ.

АКъУ-м ипресс-къулыкъу