ГъэхъэгъэшIухэр ашIыгъэх
ДзюдомкIэ Урысыем ичемпионат жъоныгъуакIэм и 24-м щегъэжьагъэу и 27-м нэс къалэу Уфа щыкIуагъ. Зэхэзымыхырэ спортсменхэм ащ зыщаушэтыгъ.
Мыекъуапэ олимпийскэ резервым испорт еджапIэу Кобл Якъубэ ыцIэ зыхьырэм испортсменитIу зэнэкъокъум хэлэжьагъэх. Ахэр Беданэкъо Зауррэ Инна Кибиткинамрэ. Тренерыр Беданэкъо Байзэт.
СпортымкIэ заслуженнэ мастерэу Беданэкъо Заур медалитIу къыхьыгъ. Килограмм 90-м нэс къэзыщэчыхэрэм якуп зыщэбанэм чемпион хъугъэ. Тиспортсмен ыуж къинагъэх Дагъыстан, Башкортостан ыкIи Киров хэкум ялIыкIохэр. Джащ фэдэу Заур джыри зы джэрз медаль къыфагъэшъошагъ.
Инна Кибиткинар килограмм 63-м нэс къэзыщэчыхэрэм якуп щыбэнагъ ыкIи дышъэ медаль къыхьыгъ. Зэнэкъокъум ифинал ар республикэу Тыва къикIыгъэ спортсменкэм щытекIуагъ. ГъэхъэгъэшIухэр зышIыгъэ спортсменхэм къафэгушIуагъ ыкIи гущыIэ дэхабэ къафиIуагъ Адыгэ Республикэм и ЛIышъхьэу КъумпIыл Мурат.