КикбоксингымкIэ дунаим ыкIи Европэм ячемпионкэу, джырэ уахътэм профессиональнэ боксымкIэ чемпионкэу Светлана Кулаковар Адыгеим ихьэ­кIагъ.

Программэу агъэнэфагъэм диштэу зэлъашIэрэ спортсменкэр Iофтхьэбзэ зэфэшъхьафхэм ахэлэ­жьагъ. БоксымкIэ ныб­жьыкIэхэм язэнэкъокъоу «Юность Майкопа», джащ фэдэу Адыгеим ибзылъфыгъэхэм я Союз кIэщакIо зыфэхъугъэ Iофтхьабзэу «100 минут диалога с ус­пешной женщиной» зыфи­Iохэрэм ар яхьэкIагъ.

Нэужым Адыгеим боксымкIэ и Федерацие ипащэу Сихъу Аскэрбый спортымкIэ заслуженнэ мастерыр ригъэблэгъагъ Красногвардейскэ районым. Мы муниципалитетым къыщызэIуахыгъэ спорт комплек­сэу «Кавказ» зыфиIорэм боксым исекцие Iоф ышIэ­нэу щыригъэжьагъ. Спорт­сменкэм шIуфэс гущыIэхэмкIэ зыкъыфигъэзагъ район администрацием ипащи. Ау анахь мэхьанэшхо зиIагъэр боксым пылъ кIэлэцIыкIу­хэр зэлъашIэрэ спортсменкэм IукIэнхэ, ащ зыдагъэсэн амал зэряIагъэр ары.