УФ-м ишъолъыр 59-мэ ащыщ студент 800 зыхэлэжьэгъэ я XVIII-рэ Урысые ныбжьыкIэ зэнэкъокъоу «Сихэбзэгъэуцу гукъэкI» зыфиIорэр рагъэкIокIыгъ.

Анахь дэгъоу зыкъэзыгъэ­лъэгъогъэ нэбгырэ 230-рэ Москва рагъэблэгъэгъагъэх япроектхэр зэIухыгъэ шIыкIэм тетэу къыщаухъумэнхэу. Ахэм ахэфагъэх Адыгэ къэ­ралыгъо университетым щеджэрэ студентиплI, ахэмэ а I-рэ шъуашэ зиIэ дип­ломхэр къыдахыгъэх.

Москва дэт Конгресс­-гупчэу «Космос» зыфиIорэр ары ныбжьыкIэхэр зыщызэнэкъокъугъэхэр, жъоны­гъуакIэм и 16-м къыщегъэ­жьагъэу и 18-м нэс яшIэныгъэхэр аушэтыгъ. Проектхэр къызэраухъумагъэхэм зэ­фэ­хьысыжьхэр зыфашIыхэм, АКъУ-м июридическэ факультет щеджэрэ нэбгыриплIымэ яехэр анахь дэгъу­хэу къыхагъэщыгъэх: «Соматическэ фитыныгъэр непэрэ лIэужым ифитыныгъэу плъы­тэмэ хъущт» зыфиIорэр зы­тхыгъэ Геннадий Вальковыр я 3-рэ курсым ис, «АР-м зекIоным зыщегъэушъомб­гъугъэным» зыфиIорэ Iоф­шIагъэр зиехэу Гъыщ Мадинэрэ Данила Шаройкэрэ, ахэр апэрэ курсым щеджэх. Юридическэ шIэныгъэхэмкIэ кандидатхэу, доцентхэу Дзыбэ Саидэрэ ХьакIэкIо Беллэрэ студентхэр зэнэкъо­къум фагъэхьазырыгъэх.

Шъугу къэдгъэкIыжьын, мы Урысые зэнэкъокъум хэ­лажьэхэрэр гъсэныгъэ зы­щарагъэгъотырэ организа­циехэм ащеджэхэрэ ныбжьыкIэхэу илъэс 14-м къыщегъэжьагъэу 30-м нэс зы­ныбжьхэр ары.

Адыгэ къэралыгъо университетым ипресс-къулыкъу