УФ-м культурэмкIэ и Министерствэ ыгъэнэфэгъэ Iофтхьабзэмэ адиштэу Луганскэ академическэ урыс драматическэ театрэу П. Луспекаевым ыцIэ зыхьырэм игастрольхэр Росконцертым къэралыгъом ишъолъырхэм ащызэхищагъэх.

Ащ диштэу жъоныгъуакIэм и 27 — 28-м АР-м и Лъэпкъ теат­рэу Цэй Ибрахьимэ ыцIэ зыхьырэм мы театрэм спектаклэхэу «Ханума» ыкIи «Ревизор» зыфиIохэрэр къыщигъэлъэгъуагъэх.

Луганскэ къикIыгъэ театрэм идиректорэу ыкIи ихудожественнэ пащэу Галина Михайлюк — Филиповам зэIукIэгъоу тиартистхэм адыриIагъэм Адыгеим культурэ Iофтхьабзэхэр бэу зэрэщыкIохэрэм ынаIэ зэрэтыридзагъэр щыхигъэунэфыкIыгъ. УФ-м культурэмкIэ и Министерствэ «Гастроль инхэр» зыфиIорэ программэу зэхи­гъэуцуагъэм Урысыем ишъо­лъырхэм якультурэ хэхъоныгъэ­хэр ышIынхэмкIэ, цIыфхэр, лъэпкъхэр нахь зэрэшIэнхэмкIэ мэхьанэшхо иIэу зэрилъэгъурэр къы­Iуагъ. Ащ хэщагъэхэу ежьхэм творческэ кIуачIэу яIэр амыгъэ­хьаулыеу, зыкъагъэ­лъэгъон, зарагъэшIэн амалхэр къазэрэритырэм ишIогъэшхэ къэкIонэу щэгугъых. Спектаклэу «Ревизор» нахь ыпаIокIэ къагъэлъэгъонэу щытыгъ, ау ащ хэлэжьэрэ хъулъфыгъэ артистхэр хэушъхьафыкIыгъэ дзэ операцием хэлэжьэнхэу зэ­рэдэкIыгъэхэм ыкIи зэкIэми къызэрамыгъэзэжьышъугъэм къыхэкIэу къэгъэлъэгъоныр зэкIахьан фаеу хъугъэ. «Гастроль инхэр» къызщежьэщт уахътэм ехъулIэу хэ­зыгъэу хъугъэ артистхэм ачIыпIэ иуцо­щтхэр агъэнафэхи къэгъэлъэгъоныр икIэрыкIэу агъэуцу­жьыгъ.

«ТыщыI, тэпсэу, пшъэрылъ шъхьаIэу тиIэр творчествэр ары! — хигъэунэфыкIыгъ Луганскэ театрэм ипащэ. Тиспектаклэхэр къэттынхэм ыпэкIэ театрэ кIоцIым цIыфхэр къызэрэщызэрэугъоищтыгъэхэм тылъыплъагъ. Адыгеир театральнэ шъолъырэу, Мыекъуапэ театральнэ къалэу зэрэщытыр тигуапэу хэдгъэунэфыкIыгъ. Насыпыгъ ащ фэдэ чIыпIэм ущыпсэуныр. Къэлэ паркым тызыдахьэм ащи культурэ Iофтхьабзэхэр зэрэщыкIо­хэрэр, къэшъокIо ныбжьыкIэхэм зыкъызэрагъэлъагъорэр тлъэгъу­гъэ. Ащ пае къэмынэу театрэм къэкIощтхэри къахэкIыгъэх. Ар зымыуасэ щыIэп».

Луганскэ театрэм иактерхэм къагъэлъэгъогъэ спектаклэхэм ежьхэм яекIолIакIэ къахэщэу гъэпсыгъагъэх. КъокIыпIэ лъэпкъ­хэм якультурэ изэмы­шъогъу баигъэрэ урыс классикэм итхыгъэ непэрэ мафэм зэрэдиштэрэмрэ ахэплъэгъукIыныр гъэшIэгъоныгъ.

«Пстэури дахэу къытпэгъо­кIыгъ, макъэр, остыгъэхэр зыгъэпсыгъэхэр, декорациехэр зыгъэуцугъэхэр — зэкIэ къыддеIагъэхэм «тхьашъуегъэ­псэу» ятIожьымэ тшIоигъу. Тиунэ тыкъифэжьыгъэм фэдагъ, ащ лъэшэу уасэ фэтшIыгъ!» — къы­хигъэщыгъ Луганскэ театрэм ипащэ.

Луганскэ театрэм икъэгъэлъэ­гъонхэр Ставрополь, Элиста ыкIи Ростов-на-Дону мы охътэ благъэм ащыкIощтых.

Тэу Замир. Сурэтыр: АР-м и Лъэпкъ театрэ ихъарзынэщ.