ЖъоныгъуакIэм и 27-м къыщегъэжьагъэу и 29-м нэс къэзэкъ культурэм ия ХХХII-рэ фестиваль-зэнэкъокъу Адыгеим щыкIуагъ.

Ащ хэлэжьагъэх хэгъэгум ишъолъыр 18-мэ къарыкIыгъэ купхэр. Мы илъэсым нэмыкI чIыпIэхэм къарыкIыгъэхэри ащ хэлэжьэнхэу къэкIогъагъэх: Ямало-Ненецкэ автоном шъолъы­рым, республикэхэу Хакасием, Ингушетием, Марий Эл, Алтаим, Приморскэ краим, Севастополь ыкIи Псковскэ хэкум ялIыкIохэр.

Фестивалым изэхэщэкIуагъэр Ассоциациеу «Къэзэкъ культурэм ишъолъыр фестиваль» зыфиIорэр ары. Ащ игъусагъэх президент грантхэмкIэ Фондыр, Адыгэ Республикэм IофшIэнымрэ социальнэ хэхъоныгъэмрэкIэ и Министерствэ, культурэмкIэ и Министерствэ къалэу Мыекъуапэ иадминистрацие, Мыекъопэ районыр, Пшызэ къэзэкъыдзэм и Мыекъопэ къэзэкъ отдел. Мыекъопэ къэзэкъыдзэм иатаманэу Александр Даниловым къызэриIуагъэмкIэ, осэшIхэм унашъоу ашIыгъэм тетэу мы илъэсым фестивалым зэнэкъокъу нэшанэ иIэ хъугъэ, хэлажьэхэрэми нахь шэпхъэ гъэиныгъэхэр афашIыгъэх.

— КIэух зэнэкъокъум шъо­лъыр 32-мэ къарыкIыгъэ купхэр хэлэжьагъэх, пстэумкIи лъэIу тхылъэу къатыгъагъэр 270-м ехъу. Программэр игъэкIотыгъэу ыкIи гъэшIэгъонэу щытыгъ. ХьакIэхэр – нэмыкI шъолъырхэм ялIыкIохэр Адыгеим ичIыпIэ анахь дахэхэр ыкIи анахь гъэшIэгъонхэр ягъэлъэгъугъэным пае къыращэкIыгъэх, — къыхигъэщыгъ атаманым. Мэфэ заулэм кIыкIоцI хьакIэу къекIолIагъэхэм культурнэ ыкIи нэмыкI Iофтхьабзэхэр арагъэлъэ­гъугъэх, къэзэкъ шэн-хабзэхэм атетэу ахэр зэхащэгъагъэх. Джащ фэдэу спортымкIэ зэнэкъо­къухэр рекIокIыгъэх, IэшIагъэ­хэмрэ изобразительнэ искусствэмрэ япхыгъэ пкъыгъо зэфэшъхьафхэр къагъэлъэгъуагъэх, къэзэкъ шхынхэм нэIуасэ афа­шIыгъэх.

Пшызэ къэзэкъ хорым ихудожественнэ пащэ игуадзэу, Пшызэрэ Республикэу Ингушетиемрэ культурэмкIэ язаслуженнэ IофышIэу, Адыгеим искусствэхэмкIэ изаслуженнэ IофышIэшхоу Виктор Захарченкэм пэщэныгъэ зыдызэрихьэгъэ осэшI купым мы фестивалым хэлэжьагъэхэм уасэ къафишIыгъ.

Фестивалым икIэухым текIоныгъэр къыдэзыхыгъэхэм афэгушIуагъэх, джащ фэдэу творческэ коллектив анахь дэгъухэм яконцерт щыIагъ.

Къэзэкъ культурэм ифестиваль итын анахь лъапIэрэ Адыгеим и ЛIышъхьэ итынрэ зыфагъэшъошагъэхэр къалэу Мые­къуа­пэ къикIыгъэ хорэу «Къэзэкъ орэдыр» зыфиIорэр ары.

Александра Балабась. Сурэтыр авторым ий.