Илъэс къэс зэхащэрэ Урысые Iофтхьабзэу «Библионочь – 2023» зыфиIорэр Адыгэ рес­публикэ кIэлэцIыкIу тхылъеджапIэм щыкIуагъ.

«Библиосумерки» зыфиIорэ мэфэкIыр чэщым рамыгъажьэу, мафэм сыхьатыр 4-м щегъэ­жьагъэу пчыхьэм сыхьатыр 7-м нэс кIэлэцIыкIу тхылъеджапIэхэм ащыкIуагъ.

Мы мафэм Адыгэ республикэ кIэлэцIыкIу тхылъеджапIэм иеджэкIо цIыкIухэр Iофтхьабзэу «Остров Чтения» ригъэблэгъагъэх.

ЗэкIэ хьакIэхэм Iофтхьэбзэ зэмылIэужыгъуабэ къяжэщтыгъ.

КIэлэцIыкIухэм къапэгъокIыгъэх хырыхыхьэхэр, викторинэхэр ыкIи спорт зэнэкъокъухэр зыхэт джэгукIэ программэу «Улыбнитесь! Вы в библиотеке» зыфиIорэм хэлажьэхэрэ персонажхэу – Кащей Бессмертнэр, Баба – Ягар ыкIи Василиса Прекраснаяр.

МэфэкIыр ащ ыужым тхылъеджэпIэ кIоцIым щы­кIуагъ. Ащ анахь цIыкIухэм апае программэу «Приключение с Алисой в Стране Чудес» зыфиIорэр щыкIуагъ.

ЕджэкIо цIыкIухэм апаекIэ литературнэ зекIо зэхащэгъагъ, ахэр якIэсэ пшысэхэм ягеройхэм аIукIагъэх.

Тхылъеджэ цIыкIухэр агъэгушIуагъэх нысхъап театрэу «Дышъэ къошын» зыфиIорэм хэт артистхэм, сабыйхэр зэрашIоигъуагъэм тетэу нысхъапэм Iоф зэрадашIэрэм фагъэнэIосагъэх.

ЗэлъашIэрэ урыс драматургэу А. Островскэр къызыхъугъэр мы илъэсым илъэс 200 зэрэхъурэм епхыгъэу ащ ипьесэу «Женитьба Бальзаминова» зыфиIоу къалэу Мыекъуапэ искусствэхэмкIэ икIэлэцIыкIу еджапIэу N 1-м театрэ искусствэмкIэ икъутамэ щеджэхэрэм къагъэхьазырыгъэм рагъэплъыгъэх.

Анахь хъупхъэхэу мэфэкIым къекIолIагъэхэм ащыщ­хэр гъэсэныгъэ-шIэныгъэ джэгун программэу «Ар тэ ткIугъэп, ар тэ къытатыгъэп» зыфиIорэм ыкIи «ГущыIэм ишъэф» зыфиIорэ зэнэкъокъу-къэшIыным хэлэжьагъэх.

Орэдыр зикIасэхэри зэщыгъэхэп: Iофтхьабзэу «Путешествие по музыкальным страницам» ыкIи концертэу «Музыкальная капель» зыфиIоу кIэлэ­цIыкIу кинофильмэхэм ыкIи мультфильмэхэм ахэт орэдхэр къызыщаIуагъэхэм ягуапэу ядэIугъэх. Джащ фэдэу «Сказочное Поле чудес» зыфиIорэ программэми, «Поем все вместе» зыфиIорэми бэ ахэлэжьагъэр.

ТхылъеджапIэм ифойе зэрэщытэу тхылъыкIэ къэгъэлъэгъонхэмкIэ гъэкIэрэкIэгъагъэ, ахэм акIэрытхэу нэбгырабэмэ сурэтхэр зытырахыгъэх.

МэфэкIыр фэбэгъэ-дэхагъэ хэлъэу кIуагъэ, ащ изэхэщэкIуагъэх Даур Саидэрэ отделым ипащэу Нина Купреенкэмрэ.

(Тикорр.).