ВолейболымкIэ Мыекъуапэ изэIухыгъэ чем­пионат аухыгъ. Зэнэкъокъур гъэтхапэм и 18-м рагъэжьэгъагъ ыкIи ащ хъулъфыгъэ ыкIи бзылъфыгъэ командэхэр хэлэжьагъэх.

Зэфэхьысыжьхэм къызэрагъэ­лъэ­гъуагъэмкIэ, мы аужырэ илъэ­си 7-м къыкIоцI яхэнэрэу текIоны­гъэр къыдихыгъ командэу «АГУ-Мары» зыфиIорэм. ЯтIонэрэ чIыпIэр къыдахыгъ хьыкум пристав­хэм, ящэнэрэ чIыпIэр ыубытыгъ 2022-рэ илъэсым зэнэкъокъум ичемпионыгъэу «Нартым». Хъу­лъфыгъэхэм ялигэ иешIэкIо анахь дэгъоу къыхахыгъэх Эзиз Рахмановыр («АГУ-Мары»), Къуныжъ Азэмат («ФССП»), Данил Крущенкэр («Нарт»).

Бзылъфыгъэхэм язэнэкъокъуи гъэшIэгъонэу кIуагъэ. Апэрэ ­лигэм команди 8 хэтыгъ, ахэр купитIоу гощыгъагъэх. Финалым нэсыгъэр тIу, «Адыгеир» «Адыгэ къэралыгъо университетым» текIуи, те­кIоныгъэр къыдихыгъ. ЗэIукIэгъур 3:0-у аухыгъ. Ящэнэрэ чIыпIэр «МГТУ-м» ыхьыгъ, ар «Викторием» нахь лъэшыгъ. ЕшIэкIо анахь дэгъоу къыхахыгъэх Олеся Боб­ровар («Адыгеир»), Элина Борисовар («АГУ»), Екатерина Рудая («МГТУ»).

ЯтIонэрэ бзылъфыгъэ лигэм команди 6 щызэнэкъокъугъ. Ахэм ахэтыгъэх Джэджэ, Кощхьэблэ ыкIи Мыекъопэ районхэм ялIыкIохэр. ТекIоныгъэр къыдихыгъ Мыекъопэ районым икомандэу «Олимп» зыфиIорэм. ЯтIонэрэ чIыпIэр фагъэшъошагъ Мыекъопэ къэралыгъо технологическэ университетым иполитехническэ кол­ледж, ящэнэрэ хъугъэ Джэджэ районым икомандэ. ЕшIэкIо анахь дэгъоу къыхагъэщыгъэх: Арина Шейко («Олимп»), Дарья Григорьевар («Политехническэ колледж»), Ксения Чурсинар («Джа­джэ»).

ХагъэунэфыкIырэ чIыпIэхэр къыдэзыхыгъэхэм зэкIэми кубок­хэр, медальхэр, дипломхэр ыкIи ахъщэ шIухьафтынхэр афагъэ­шъошагъэх.