ФутболымкIэ Урысыем ипервенствэ иятIонэрэ лигэ щешIэрэ Мыекъопэ «Зэкъошныгъэр» купым апэрэ чIыпIэр щызыIыгъ «СКА» (Ростов-на-Дону) IукIагъ ыкIи тикомандэ текIоныгъэр къыдихыгъ.

«Зэкъошныгъ» (Мыекъуапэ) – «СКА» (Ростов-на-Дону) – 3:1 (0:0).

Апэрэ таймым командэхэм ешIэкIэ гъэшIэгъон къагъэлъэ­гъуагъэп. Апэрэ такъикъ 45-м хьакIэхэр нахьыбэрэ ыпэкIэ илъы­гъэх, ау зи къадэхъугъэп. ЯтIонэрэ таймым зэкIэри зэблэхъугъэ хъугъэ. «Зэкъошныгъэм» нахь лъэшэу зыкъыгъэлъэгъуагъ. ЕшIапIэм къызихьагъэм ыуж такъикъ заулэ тешIагъэу Iэщэ Анзор шъхьэ­кIэ Iэгуаор къэлапчъэм дидзагъ. Ащ ыуж пчъагъэм хи­гъэхъон амал иIагъ Датхъужь Адамэ. Пчъагъэм хэзгъэхъуагъэр Даниил Антоненкэр ары. Я 56-рэ такъикъым Делэкъо Аскэр пчъагъэр 3:0 ышIыгъ.

ХьакIэхэм тикъэлапчъэ зэ Iэгуаор къыдадзэн алъэкIыгъ, я 66-рэ такъикъым пчъагъэр 3:1 зышIыгъэр Шамиль Мавляновыр ары.

— Шъыпкъэу пIощтмэ, апэрэ таймым хьакIэхэм къэлапчъэм Iэгуаор дадзэным нахь пэблэгъагъэх, ау тикъэлъэпчъэIут дэгъоу зыкъыгъэлъэгъуагъ. Зы­гъэпсыфыгъо уахътэм ешIакIохэм ащыщхэр зэблэсхъугъэх, ащ ишIуагъэкIэ гъогогъуищэ къэлапчъэм Iэгуаор дэтыдзэн ыкIи купым апэрэ чIыпIэр щызыIыгъ командэм тытекIон тлъэкIыгъ, — къы­Iуагъ «Зэкъошныгъэм» итренер шъхьаIэу Беслан Аджинджал.

Мы текIоныгъэм ыуж тикомандэ ящэнэрэ чIыпIэм къэнагъ. Непэрэ мафэм ехъулIэу командэхэр зыдэщыт чIыпIэхэр ыкIи очко чъагъэу рагъэкъугъэр: 1. «СКА» — 29, 2. «Спартак (Налщык) — 26, 3. «Зэкъошныгъ» — 24, 4. «Легион» (Махачкала) — 23, 5. «Динамо» (Ставрополь) – 18, 6. «Машук-КМВ» — 15, 7. «Алания-2» — 11.

КъыкIэлъыкIощт ешIэгъур «Зэкъошныгъэм» Ставрополь щыриIэщт, мэкъуогъум и 4-м «Легион» (Махачкала) тихьэкIэщт.