Егъэджэнхэр зэхащагъэх
2023-рэ илъэсым жъоныгъуакIэм и 17-м АР-м и Оперативнэ штаб терроризмэм пэшIуекIогъэным фэIорышIэрэ егъэджэнхэр гъэсэныгъэ учреждениехэм ащыщхэм ащыригъэкIокIыгъ.
[caption id="attachment_133008" align="aligncenter" width="800"] ЩынэгъончъэнымкIэ федеральнэ къулыкъум ипресс-къулыкъу.[/caption]
Щынагъор дэгъэзыжьыгъэным ыкIи ащ ыпкъ къикIэу хъугъэ-шIагъэхэр къэхъумэ ахэр щыгъэзыегъэнхэм фэIорышIэрэ Iофтхьабзэм хэлэжьагъэх щынэгъончъэнымкIэ федеральнэ къулыкъум и ГъэIорышIапIэу АР-м щыIэм, Урысыем иуголовнэ-гъэцэкIэкIо системэ и ГъэIорышIапIэу АР-м щыIэм, УФ-м ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм, Росгвардием и ГъэIорышIапIэу АР-м щыIэм, хэушъхьафыкIыгъэ зэпхыныгъэмкIэ ыкIи ухъумэнымкIэ федеральнэ къулыкъум икъэбарлъыгъэIэс и Гупчэу АР-м щыIэм якIуачIэхэр.
Егъэджэным къыдыхэлъытагъэу 2023-рэ илъэсым жъоныгъуакIэм и 17-м амыгъэунэфыгъэ нэбгыритIум уIэшыгъэ кIуачIэр къызфагъэфеди, Шэуджэн районым ит къуаджэу Хьакурынэхьаблэ дэт гурыт еджапIэу N 1-р аштагъ. Ащ ыпкъ къикIэу еджапIэр къэзыгъэгъунэрэ хъулъфыгъэм щэр къытефи шъобжхэр тещагъэ хъугъэ. Мы чIыпIэм хэбзэухъумэкIо къулыкъухэр къызэсыхэм агъэунэфыгъ: еджапIэм къытебэнэгъэ бзэджашIэхэм яIалъмэкъ къэорэ пкъыгъор илъэу гъэсэныгъэм иучрежде- ние дахьи, кIэлэеджакIохэм ащыщхэр гъэрэу аубытыгъэх ыкIи ахэр еджапIэм ишхапIэ щаIыгъыгъэх.
ХэбзэухъумэкIо къулыкъухэм яIофышIэхэм кIэлэеджакIохэр ыкIи мыщ Iоф щызышIэхэрэр агъэкощыгъэх. ЕджапIэр къадзыхьагъ, бзэджашIэхэр зыдэкIонхэ щымыIэу хъугъэ. АР-м и Оперативнэ штаб иунашъокIэ терроризмэм пэшIуекIорэ Iофтхьабзэр зэхащагъ, террористхэр къаубытыгъэх.
Егъэджэным хахьэу агъэнэфагъэр зэкIэ зэшIохыгъэ хъугъэ. КIэух зэфэхьысыжьхэм къызэрагъэлъэгъуагъэмкIэ, терроризмэ нэшанэ зиIэ хъугъэ-шIагъэ къэхъумэ ащ пэшIуекIонхэ зылъэкIыщт кIуачIи ыкIи амали АР-м и Оперативнэ штаб IэкIэлъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу.