Мыекъопэ къэралыгъо техно­логи­­ческэ университетым исту­дент купэу КIэдэкIое Нэфсэт зипащэм адыгэ шъхьарыхъонхэм якъыдэгъэкIынкIэ проект егъэхьазыры.

Ахэм адыгэ тхыпхъэхэр ате­шIыхьэгъэщтых, республикэм зекIоу къихьэхэрэм аращэнэу ары гухэлъэу яIэр. «Прошлое в будущее 2.0» зэреджагъэхэр проектым.

— Этнотуризмэм зегъэ­ушъом­бгъугъэныр, лъэпкъ шъуашэр, шэн-хабзэхэр къызэтегъэнэжьыгъэнхэр ары проектыр зытегъэпсыхьагъэр. Шъхьарыхъонхэр сувенир пшIыми хъунэу, лъэпкъ нэшанэ изыфэпакIэ хилъхьанэу шIоигъоныгъэ зиIэми ыгъэфедэн ылъэкIынэу щытыным пае непэрэ лъэхъаным диштэу дыгъэнэу тыфай, — къыIуагъ проектым игъэхьазырын пылъ купым ипащэу, технологическэ факультетым ия 3-рэ курс исэу Анна Горковенкэм.

Ар илъэс пчъагъэ хъугъэу щыгъынхэр зэрэгъэпсыгъэщтхэм изэхэгъэуцон Iоф дешIэ. НахьыпэкIэ поселкэу Тульскэм IэшIагъэхэм ащыпылъыгъ, етIанэ колледжым иеджэн щылъигъэ­кIотагъ.

Мыекъопэ технологическэ университетым щеджэзэ, дизайнер ныбжьыкIэхэм я Дунэе зэнэкъокъоу «Адмиралтейская игла» зыфиIорэм хэлажьи, текIоныгъэр къыщыдэзыхыгъэ­хэм ащыщ хъугъэ. Гъэмэфэ уахътэм къалэу Милан стажировкэ къыщикIунэу ащ фитыныгъэ къыратыгъ.

Адыгэ шъхьарыхъонхэм япроект ащ ыпэкIи мы апшъэрэ еджапIэм щыпылъыгъэх, ащыгъум мы лъэпкъым щылажьэу, еджапIэм Iоф къыдэзышIэхэрэм ащыщ пшъэрылъ къафишIыгъэу, лъэпкъ тхыпхъэхэр зэрэхэдыкIыгъэхэр, цифрэ шIыкIэр ащ пае зэрэбгъэфедэщтыр зэра­гъашIэщтыгъ. Джы партнерыр къыхэмыхьэу, зекIо къакIохэрэм апае агъэхьазырынхэу КIэдэкIое Нэфсэт предложение къафихьи, ыуж ихьагъэх.

— ЩэфакIохэр анахьэу зыфэещтхэр зэдгъэшIэным пае шъхьарыхъоныр шэкIэу зыхэшIыкIыгъэмэ нахьышIум, шъоу иIэщтым, нэмыкIхэм афэгъэхьыгъэу упчIэхэр дгъэ­хьазырыгъэх. Адыгеим зыщагъэпсэфынэу къакIомэ зышIоигъохэм ахэр афэдгъэзэнхэу ары пшъэрылъэу зыфэдгъэуцужьыгъэр. Ар IэшIэхэп, сыда пIомэ джэуап къытэзыты­жьынэу тищыкIагъэр бэ, ахэр гъотыгъошIухэп. Ащ пай ти­нэIуасэхэм зафэтэгъазэ, интернетыр тэгъэфедэ. Ащ дакIоу проектым игъэхьазырыни лъытэгъэкIуатэ, — къы­Iуагъ Аннэ.

ЖъоныгъуакIэм ыкIэм нэс шъхьарыхъоныр зыфэдэщтыр къэлъэгъоным ар щэгугъы.