Теннис цIыкIумкIэ зэнэкъокъоу Апшеронскэ районым ипсэупIэу Николаенкэм щыкIуагъэм Мыекъуапэ илIыкIохэм дэгъоу зыкъыщагъэлъэгъуагъ, хагъэунэфыкIырэ чIыпIэхэр къафагъэшъошагъэх.

Хэгъэгу зэошхом ТекIоныгъэр къызыщыдахыгъэм ихэгъэунэфыкIын къыдыхэлъытагъэу спорт еджапIэу «Олимп» зыфиIорэм изэIухыгъэ первенствэ рагъэ­кIокIыгъ.

Аныбжь елъытыгъэу спортсменхэр купищэу гощыгъагъэх, ахэр текIоныгъэм ыкIи хагъэунэфыкIырэ чIыпIэхэм афэбэнагъэх. Мые­къуапэ олимпийскэ резервымкIэ испорт еджапIэу С.М. Джанчатэм ыцIэ зыхьырэм зыщызыгъэсэхэрэ Адам Матюшиным ыкIи Бзаго Дамир медальхэр къахьыгъэх, ахэр апэрэ ыкIи ятIонэрэ хъу­гъэх. КIалэхэр зыгъасэхэрэр Бзаго Рустам.

Джащ фэдэу олимпийскэ резервымкIэ спорт еджапIэу N 3-м илIыкIохэми гъэхъэгъэшIухэр ашIыгъэх. Тренерэу Татьяна Олейниковам ыгъасэхэрэм ха­гъэунэфыкIырэ чIыпIитIу къыда­хыгъ, ахэр Нэхэе Дмитрийрэ Арина Петровскаямрэ.