Зэнэкъокъухэм ахэлэжьагъэх хэбзэухъумакIохэр, хьыкум приставхэр, УФ-м ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэмрэ бзэджашIэхэм пшъэдэкIыжь ягъэхьыгъэнымкIэ федеральнэ къулыкъум республикэмкIэ и ГъэIорышIапIэрэ ялIыкIохэр, нэмыкIхэри.

КъулыкъушIэхэм лъэныкъуи 6-кIэ заушэтыгъ. Анахь гъэшIэгъонэу рекIокIыгъэр къы­зэдэчъэнымкIэ эстафетэр ары. Ащ текIоныгъэр къыщыдихыгъ Росгвардием вневедомственнэ ухъумэнымкIэ иотдел икомандэ. Мыщ хэтхэр анахь лъэшыгъэх кIапсэр зэпэкъудыигъэнымкIэ, автоматэу Калашниковым изэхэхынкIэ ыкIи изэхэлъхьажьынкIэ, мы пшъэрылъыр псынкIэ дэдэу ыгъэцэкIагъ Iэшъхьэмэфэ Азэмат. УФ-м ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм илIыкIо такъыкъи 5-м къыкIоцI килограмм 24-рэ къэзыщэчырэ гирыр гъогогъу 97-рэ къыIэтыгъ, мы лъэ­ныкъомкIэ ащ текIоныгъэр къыдихыгъ. МэфэкI Iофтхьабзэр футбол цIыкIум ифинал ешIэгъукIэ аухыгъ.

БЗЭШIУ Асхьад.