Урысые зэнэкъокъоу «Локобаскет — Школьная лига» зыфиIорэм исуперфинал жъоныгъуакIэм и 5-м къалэу Челябинскэ щыкIуагъ. Мыекъуапэ олимпийскэ резервымкIэ испорт еджапIэу В.С. Максимовым ыцIэ зыхьырэм ибаскетболистхэр чемпион хъугъэх.

Зэнэкъокъум ифинал щызэIукIагъэх Адыгэ Республикэм ыкIи Калининград хэкум якомандэхэр. ТикIалэхэм ешIэкIэ дахэ къагъэлъэгъуагъ ыкIи текIоныгъэр къыдахыгъ, пчъагъэр — 60:45 (16:7, 17:14, 18:14, 9:10). Финал едзыгъом къыдыхэлъытагъэу Мыекъуапэ илIыкIохэм ешIэгъуи 6 яIагъ, куп уцугъом Приморскэ краим ыкIи Ростов хэкум якомандэхэм атекIуагъ, нэужым Тульскэ ыкIи Нижегородскэ хэкухэм, финалныкъом Калужскэ хэкум къашIуахьыгъ.

Урысые зэнэкъокъур 2006-рэ илъэсым щыублагъэу рагъэкIокIы, Адыгеим икомандэ апэрэу чемпион хъугъэ.

БЗЭШIУ Асхьад.