Медаль 15 къахьыгъ
Адыгеим испортсменхэм атлетикэ онтэгъумкIэ Къыблэ федеральнэ шъолъырым ичемпионатрэ ипервенствэрэ медаль 15 къащахьыгъ.
Краснодар краим ипсэупIэу Сукко щыкIогъэ зэнэкъокъухэм спортсмен анахь лъэшхэр щызэрэугъоигъэх.
Адыгеим илIыкIохэм зэфэхьысыжь дэгъухэр къызэрагъэлъэгъощтхэм дакIоу командэхэм азыфагу текIоныгъэр къыщыдахыныр япшъэрылъыгъ ыкIи тиспортсменхэм ар къадэхъугъ. ТикIалэхэм медали 10 къахьыгъ: дышъэу 3, джэрз ыкIи тыжьын плIырыплI. ТекIоныгъэр къыдахыгъ Ацумыжъ Самир, Даниил Громовым. Килограмм 61-м нэс къэзыщэчыхэрэм язэнэкъокъу хагъэунэфыкIырэ чIыпIищыр тикIалэхэм къахьыгъ. ТекIоныгъэр Бгъуашэ Асхьад къыдихыгъ, Валерий Пугачевыр ятIонэрэ хъугъэ, ящэнэрэ чIыпIэр ЛъэпцIэрышэ Рэмэзан къыфагъэшъошагъ. Пшъашъэхэм язэнэкъокъу ятIонэрэ чIыпIэр къыщыдихыгъ Валерия Гарькуша.
Шъолъырым ичемпионат хэлэжьэгъэ тиспортсмен нэбгыриплIымэ гъэхъэгъэшIухэр ашIыгъэх. Чемпион хъугъэх ЩэшIэ Рустамрэ Артем Горловымрэ, Вячеслав Панкратовым ятIонэрэ чIыпIэр къыдихыгъ ыкIи спортымкIэ мастер хъуным ишапхъэхэр ыгъэцэкIагъэх, Арсен Мнацаканян ящэнэрэ хъугъэ.
ЗэкIэмкIи зэнэкъокъуитIум спортсмен 250-м ехъу ахэлэжьагъ. Урысыем ичемпионат иедзыгъо мэкъуогъум къалэу Новый Уренгой, первенствэм иуцугъо бэдзэогъум Саранскэ ащыкIощтых.