Терроризмэм пэуцужьы­гъэнымкIэ Адыгэ Республикэм икомиссие изичэзыу зэ­хэсыгъоу непэ щыIагъэм транспорт комплексыр терроризмэм щыухъумэгъэнымкIэ амал тедзэу зэрахьащтхэм, Луганскэ Народнэ Рес­публикэм, Донецкэ Народнэ Республикэм, Запорожьем, Херсон хэкум зышъхьэ къизыхыжьыгъэхэр зыдэщыIэ чIыпIэхэр ухъумэгъэнхэм, зэщыхъокIо кIуачIэхэм ныбжьыкIэхэр амыгъэплъэхъунхэм, жъоныгъокIэ мэфэкIхэр щынэгъончъэу зэхащэнхэм япхыгъэ Iофыгъохэм ыкIи нэмыкIхэм щатегущыIагъэх. Зэхэсыгъор Адыгеим и ЛIы­шъхьэу КъумпIыл Мурат зэрищагъ.

Джащ фэдэу комиссием иIоф­шIэн хэлэжьагъэх АР-м ими­нистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, прокурату­рэм, хьыкумхэм, хэбзэухъу­мэкIо къулыкъухэм, муниципалитетхэм япащэхэр.

Адыгэ Республикэм псэолъэ­шIынымкIэ, транспортымкIэ, гъогу, унэ-коммунальнэ хъыз­мэтымкIэ и Министерствэ, щы­нэгъончъагъэмкIэ Федеральнэ къулыкъум АР-мкIэ и ГъэIорышIапIэ, хэгъэгу кIоцI IофхэмкIэ Министерствэм игъэIоры­шIапIэ япащэхэм къызэраты­гъэмкIэ, 2023-рэ илъэсым иублэгъу ехъулIэу автобус мини 3,2-м ехъу республикэм щызе­кIощтыгъ. Автобус 443-р, троллейбус 25-р категориеу зыха­хьэрэр агъэнэфагъ, щынэгъончъэнымкIэ паспортхэр къаратыгъэх.

«Адыгеяавтодорым» ибаланс километри 4,5-рэ зикIыхьэгъэ лъэмыдж 77-рэ хэхьэ. Респуб­ликэм игъогухэм инженер-техническэ амалхэр ащыгъэфе­дэгъэнхэмкIэ IофшIэн гъэнэ­фагъэхэр агъэцакIэх. 2022 — 2023-рэ илъэсхэм хэбзэухъу­мэкIо къулыкъухэм егъэджэнхэр, тренировкэхэр зэхащагъэх, унэшъо гъэнэфагъэхэр аштагъэх, IофышIэ заулэмэ дисциплинарнэ пшъэдэкIыжь арагъэ­хьыгъ. Транспорт псэуа­лъэхэм апэблэгъэ гъогу-патруль къулыкъухэм ахэгъэхъо­гъэн, мэшIоку гъогумкIэ Мые­къуапэ къакIохэрэм гъунэ алъы­фыгъэн зэрэфаер зэхэ­сыгъом къыщаIуагъ.

Республикэм и ЛIышъхьэ къулыкъу гъэнэфагъэхэм пшъэ­рылъ афишIыгъ транспорт инфраструктурэр зэрэухъума­гъэр зэхафынэу.

«ДжырэкIэ анахьэу мэхьанэ зиIэр мылъку къэкIуапIэхэр гъэнэфэгъэнхэр ары. Шъолъыр, федеральнэ гъогухэр планым диштэу зэтырагъэпсыхьанхэ, щынэгъончъэу щытынхэ фае. Федеральнэ къулыкъухэм зызэрафэдгъэзэрэ тхылъхэр терроризмэм пэуцужьыгъэнымкIэ комиссием иунашъохэмкIэ къэ­гъэшъыпкъэжьыгъэнхэ фае. Щы­кIагъэу къыхагъэщыхэрэр псынкIэу дамыгъэзыжьхэ хъущтэп. ХэушъхьафыкIыгъэ дзэ операциер зыщыкIорэ лъэхъаным Iофыгъо пстэуми нахь лъэ­шэу гъунэ алъыфыгъэн фае», — къыIуагъ КъумпIыл Мурат.

Адыгэ Республикэм гъэсэ­ныгъэмрэ шIэныгъэмрэкIэ и Министерствэ ипащэрэ терроризмэм пэуцужьыгъэнымкIэ Адыгэ Республикэм икомиссие иаппаратрэ ныбжьыкIэхэмрэ гъэсэныгъэмкIэ учреждениехэмрэ терроризмэм щыухъу­мэгъэнхэмкIэ, зэщыхъокIо кIуа­чIэхэм ягъогупэ пыбзыкIыгъэнымкIэ Iофэу ашIэрэм къытегущыIагъэх.

ГъэсэныгъэмкIэ организа­циехэм мы IофыгъомкIэ Iоф­тхьэбзэ миным ехъу зэращызэхащагъэр, кIэлэеджэкIо мин 46,2-м, студент мини 2,2-м ехъу ахэм зэрахэлэжьагъэр зэхэ­сыгъом щыхагъэунэфыкIыгъ. Лъэпкъ культурэхэм яфестиваль­хэр илъэс къэс Адыгеим щызэхащэх. Республикэм икIэлэ­еджакIохэмрэ иныбжьыкIэхэмрэ шъолъыр форум, къэбарлъыгъэ­Iэс Iофтхьэбзэ зэфэшъхьафхэм ахэлажьэх. Радикализацием хащэнхэ алъэкIыщтхэр нахь пасэу къызэрэхагъэщышъущт методическэ материалхэр гъэсэныгъэмкIэ учреждениехэм япащэхэмирэ якIэлэегъаджэ­хэмрэ аIэкIагъэхьагъэх.

КIэлэеджакIохэмрэ ныбжьыкIэхэмрэ пIуныгъэ Iофэу адызэрахьэрэр гъэлъэшыгъэн, зэщыхъокIо кIуачIэхэм ягъогупэ игъом пыбзыкIыгъэн зэрэфаер Адыгеим и ЛIышъхьэ къыхи­гъэщыгъ. Республикэм ипащэ зэрилъытэрэмкIэ, бэмышIэу Уры­сыем къыхэхьажьыгъэ чIыпIэхэм къарыкIыгъэ кIэлэцIыкIухэри ащ фэдэ Iофтхьабзэхэм къахарагъэубытэнхэ фае. Джащ фэдэу КъумпIыл Мурат кIэлэцIыкIу сэнаущхэм яшъолъыр зэIукIэу «Фыщт» зыфиIорэм зызэрэфагъэхьазырырэмрэ лIы­кIо купыр Урысые ныбжьыкIэ форумэу «Мэщыкъу» зыфиIорэм зэрэхэлэжьэщтымрэ анаIэ тыраригъэдзагъ.

АР-м хэгъэгу кIоцI IофхэмкIэ и Министерствэ ипащэ жъоныгъокIэ мэфэкIхэр щынэгъон­чъэнхэмкIэ амалэу зэрахьащтхэм къатегущыIагъ. Республикэм и ЛIышъхьэ муниципалитетхэм япащэхэм пшъэрылъ афишIыгъ цIыфхэр жъугъэу зыхэлэжьэрэ культурэ Iофтхьабзэхэр мы мафэхэм зэхащэхэ зыхъукIэ, хэбзэухъумэкIо къулыкъухэм игъо къафалъэгъугъэхэр зэкIэ къыдалъытэнэу.

ЛНР-м, ДНР-м, Запорожьем, Херсон хэкум зышъхьэ къизы­хыжьыгъэхэр зыдэщыIэ чIыпIэхэр щынэгъончъэнхэмкIэ амалэу зэрахьэхэрэм терроризмэм пэуцужьыгъэнымкIэ комиссием хэтхэр шъхьафэу къатегущыIагъэх. Росгвардием АР-мкIэ и ГъэIорышIапIэ ипащэ зэрэхигъэунэфыкIыгъэмкIэ, ахэр зыдэщыIэ чIыпIэхэм видеохэр ащагъэуцугъэх. Зэхэсыгъом икIэухым Адыгэ къэралыгъо университетымрэ Мыекъопэ къэралыгъо технологическэ университетымрэ зэрэухъумагъэхэм епхыгъэ Iофыгъоми хэплъагъэх.

Адыгеим и ЛIышъхьэ апшъэрэ еджапIэхэм япащэхэм пшъэрылъ афишIыгъ терроризмэм игъогупэ пыбзыкIыгъэным, дин, лъэпкъ зэгурымыIоныгъэхэр къэмыгъэ­хъугъэнхэм, экстремизмэм пэу­цужьыгъэным атегъэпсыхьэгъэ пIуныгъэ Iофэу студентхэм адызэрахьэрэр агъэлъэшынэу.

«Студентхэм агурыгъэIогъэн фае зэщыхъокIо кIуачIэхэм за­рарамыгъэплъэхъунэу. Iофхэм язытет тэрэзэу зэхашIэным, тихэгъэгу къепыйрэ къэбарлъы­гъэIэс амалхэм къэбар нэпцIэу зэрахьэхэрэр IэубытыпIэ къызы­фамышIыным мэхьанэшхо яI», — къыIуагъ КъумпIыл Мурат.

АР-м и ЛIышъхьэ ипресс-къулыкъу