КIэлэеджакIохэм я Спартакиадэ къыдыхэлъытагъэу атле­тикэ псынкIэмкIэ Мыекъуапэ ипервенствэ мы мафэхэм зэхащагъ. Илъэс къэс рагъэкIокIырэ Iофтхьабзэм нэбгырэ 500-м ехъу хэлэжьагъ.

ХагъэунэфыкIырэ чIыпIэхэр къыдэзыхыгъэ кIэлэеджакIохэр къыхагъэщыгъэх, ахэм афэгушIуагъэх. Ау мыщ дэжьым анахь шъхьаIэр нэбгырэ пэпчъ командэм къыфихьыгъэ очко пчъагъэр ары. Ащ елъытыгъ ахэр зыщеджэхэрэ гъэсэныгъэм иучреждение зэнэкъо­къум чIыпIэу щиубытыщтыр. ЗэхэщакIохэм къызэраIуагъэмкIэ, мы тхьамафэм ыкIэм нэс зэфэхьысыжьхэр ашIыщтых.

Командэхэм очко пчъагъэу рагъэкъугъэр зэфэдиз зыхъукIэ, анахьэу къыдалъытэщтыр атлетикэ псынкIэмкIэ зэнэкъокъухэм якIэуххэр ары.

Спартакиадэм иаужырэ едзыгъоу эстафетэр жъоныгъуакIэм и 9-м зэхащэщт.