Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» (ГТО) зыфиIорэм изичэзыу тхьамафэ мэлылъфэгъум и 24-м щегъэжьагъэу и 30-м нэс Мыекъуапэ щызэхащэщт.

Республикэм икъэлэ шъхьаIэ щыпсэухэрэм ямызакъоу, Адыгеим имуниципалитетхэм, Краснодар краим ялIыкIохэр Iофтхьабзэм хэлэжьэнхэ ыкIи зыщаушэтын алъэкIыщт.

Мафэ къэс, блыпэм щегъэжьагъэу тхьаумафэм нэс, Iофтхьабзэм къыдыхэлъытэгъэ шапхъэхэр цIыфхэм атынхэ алъэкIыщт. Ар зыщызэхащэрэр республикэ стадионэу «Зэкъошныгъэр» ары. Мыщ ухэлэжьэным пае официальнэ сайтэу «www.gto.ru» зыщыптхын фае.

БлэкIыгъэ Iофтхьабзэм нэбгыри 100 фэдиз хэлэжьагъ, ахэм азыныкъом комплексым ибгъэ­хэлъхьэ шъхьаIэ къафагъэшъо­шагъ.

ЗэхэщакIохэм анахьэу анаIэ зытырагъэтырэр кIэлэеджакIохэр ары, сыда пIомэ мыхэм физическэ ухьазырыныгъэу яIэм елъытыгъэу апшъэрэ ыкIи гурыт сэнэхьат зыщарагъэгъотырэ еджапIэхэм ачIэхьанхэмкIэ балл те­дзэхэр къахьынхэ алъэкIыщт.