ФутболымкIэ Урысыем ипервенствэ иятIонэрэ лигэ хэт командэхэм зичэзыу ешIэгъухэр яIагъэх.

«Легион» (Махачкала) — «Зэ­къош­ныгъ» (Мыекъуапэ) — 1:1 (1:1).

«Зэкъошныгъ»: Т. Хьачырыр, Д. Николаевыр, А. Телеповыр, У. Магомедбековыр, Т. ХъуакIор, А. Къонэр, А. Датхъужъыр (Н. Шустовыр), Д. Антоненкэр (Р. ХъуакIор), Л. Байрамян (А. Iащэр), И. Оразаевыр (И. Пекъор), А. Делэкъор.

Я 32-рэ такъикъым Артем Телеповым, я 36-м — Курбан Курбановым къэлапчъэм Iэгуаор дадзагъ.

«Зэкъошныгъэмрэ» «Легионымрэ» яешIэгъу Махачкала щыкIонэу щытыгъ, ау командэхэр Мыекъуапэ щызэдешIэнхэу зэзэгъыгъэх. Я 32-рэ такъикъым нэс яешIакIэ узIэпищэнэу щытыгъэп, футболистхэм Iэгуаор гупчэм нахьыбэрэ щаIыгъыгъ. Артем Телеповым Iэгуаор къэлапчъэм зыдедзэм, цIыфэу къэзэрэугъоигъэхэр лъэшэу гушIуагъэх Адыгеим икомандэ ыпэ зэришъыгъэм фэшI. Ау ащ ыуж такъикъи 4 тешIагъэу «Легионым» пенальти­кIэ пчъагъэр зэфэдиз ышIыгъ.

ЯтIонэрэ таймыр тикомандэкIэ къиныгъ, я 60-рэ такъикъым Хъо­кIо Темыр ятIонэрэ карточкэр судьям къыригъэлъэгъуи, ешIапIэм къыригъэкIыгъ. «Легионым» текIоныгъэр къыдихыным пэблэгъагъ, джыри зы пенальти ыгъэцэкIагъ, ау Iэгуаор къэлапчъэм дидзэшъугъэп. Пчъагъэр 1:1-у зэIукIэгъур аухыгъ.

— ЯтIонэрэ таймым ия 60-рэ такъикъ щыублагъэу нэбгырипшIэу тыджэгугъ, ащ къыхэкIыкIэ ешIэгъур тэ тызэрэфаеу хъугъэп. «Ле­гионым» хэтхэр псынкIэу мэ­гупшысэх, техникэ дахи къагъэлъагъо. ТекIоныгъэр къыдэтхыным тэри тыфэбэнагъ, ау пчъагъэр зэфэдизэу ешIэгъур тыухыгъэ, — къыIуагъ «Зэкъошныгъэм» итренер шъхьаIэу Беслан Аджинджал.

Адыгеим икомандэ зэнэкъо­къум апэрэ чIыпIэр щызыIыгъ «Черноморец» (Новороссийск) Мыекъуапэ щыIукIэщт. «Зэкъошныгъэр» я 7-рэ чIыпIэм щыт ыкIи ащ нахь лъагэу ар дэкIоен ылъэ­кIыщтэп.