АР-м и Къэралыгъо Совет — Хасэм и Тхьаматэу Владимир Нарожнэм Краснодар краим и Хэбзэгъэуцу ЗэIукIэ и Тхьаматэ игуадзэу Владимир Бекетовыр игъусэу Красногвардейскэ ыкIи Успенскэ районхэм яхэшыпыкIыгъэ ныбжьыкIэ футбол командитIумэ язэнэкъокъоу джырэблагъэ щыIагъэм еплъыгъэх.

Джащ фэдэу ащ къекIолIагъэхэм ахэтыгъэх Красногвардейскэ районым ипащэу Гъубжьэкъо Темур, Успенскэ районым иадминистрацие ипащэу Геннадий Бахилиныр, муниципальнэ образованием и Совет итхьаматэу Вэрыкъо Рэмэзан.

Адыгеим и ЛIышъхьэу КъумпIыл Му­рат пшъэрылъ зэрэфишIыгъэм тетэу республикэ парламентым ипащэу Владимир Нарожнэм зэнэкъокъум хэлажьэхэрэм шIу­фэс къарихыгъ. Ащ къызэрэхигъэщыгъэмкIэ, джырэ футбол ешIэгъум къеушыхьаты Краснодар краимрэ Адыгеимрэ язэблэгъэ­ныгъэ зэрэпытэр. Ахэр зыми зэпичынхэ зэримылъэкIыщтри къыхигъэщыгъ.

— Къошныгъэ-ныбджэгъуныгъэр ныбжьыкIэгъум къыщежьэ. Арышъ, ятIонэрэу зэ­хащэгъэ зэнэкъокъухэм мэхьанэшхо яI. ТикIэлэцIыкIухэм, спортсменхэм, творческэ коллективхэм ахэлажьэхэрэм сафэлъаIо сшIоигъу щыIэныгъэм илъэныкъо пстэумкIи гъэхъагъэхэр ашIынхэу.

Тэ, Урысыем ишъолъыритIум, тищысэкIэ къэд­­­гъэлъэгъуагъ ыкIи къэдгъэлъэгъон тлъэ­кIыщт тичIыгу, ащ щыпсэухэрэм шIоу ахэ­лъыр зэкIэ, — къыIуагъ парламентарием къэзэрэугъоигъэхэм закъыфигъазэзэ.

Владимир Бекетовым республикэм и ЛIышъхьэу КъумпIыл Мурат «Зэкъошныгъэм» и Кубок икъыдэхын чанэу зэрэхэлажьэрэм ыкIи IэпыIэгъу зэрафэхъурэм пае зэрэфэразэр къыIуагъ.

Мы Iофтхьабзэм къыдыхэлъытагъэу чъыг цIыкIухэр агъэтIысхьагъэх, Хэгъэгу зэошхом хэлэжьагъэхэм ясаугъэт къэгъа­гъэхэр кIэлъыралъхьагъэх, социальнэ мэ­хьанэ зиIэ псэолъэ заулэ къаплъыхьагъ. Ахэм зыкIэ ащыщ къэралыгъо программэу «Псауныгъэм икъэухъумэн» зыфиIорэм ипхырыщын къыдилъытэрэ врач офисэу илъэсэу икIыгъэм тыгъэгъазэм ашIыгъэр.

Районым ипащэу Геннадий Бахилиным АР-м и Къэралыгъо Совет — Хасэм и Тхьаматэу Владимир Нарожнэм муни­ципалитетхэм язэдэлэжьэныгъэ ыкIи ­лъэпкъ зэфыщытыкIэхэр гъэпытэгъэнхэм иIахь зэрахишIыхьэрэм пае Рэзэныгъэ тхылъ къыритыгъ.

Iофтхьабзэм анахь къыдилъытэщтыгъэ­хэм ащыщ Успенскэ ыкIи Красногвардейскэ районхэм азыфагу илъыщт зэдэлэжьэныгъэм фэгъэхьыгъэ зэзэгъыныгъэу зэдашIыгъэр. Мыщ къызэрэщиIорэмкIэ, зэфэдэ фитыныгъэхэр ылъапсэхэу ыкIи бгъуитIуми яфедэ хэлъэу наукэм, культу­рэм, псауныгъэм икъэухъумэн, гъэсэныгъэм, спортым ыкIи социальнэ-культурнэ щыIакIэм инэмыкI лъэныкъохэм япхыгъэу язэдэлэжьэныгъэ лъагъэкIотэщт.

Муниципалитетхэм япащэхэу Геннадий Бахилинымрэ Гъубжьэкъо Темуррэ документхэм аIапэ акIадзэжьыгъ. Джащ фэдэу Владимир Бекетовымрэ Владимир Нарожнэмрэ зэзэгъыныгъэм кIэтхэжьы­гъэх.

Шъугу къэтэгъэкIыжьы: тапэкIэ къуаджэу Улапэ «Зэкъошныгъэм» и Кубок икъыдэхын фэгъэхьыгъэ зэнэкъокъоу мэлылъфэгъум и 6-м щызэхащэгъагъэм ащкIэ зэзэгъыгъагъэх.