Украинэм щыкIорэ хэушъхьафыкIыгъэ дзэ операцием хэлажьэхэрэм ХьапэкIэ Римэ Мэсхьудэ ыпхъур афэдагъэу къэбар зызэхэтэхыр ары ащ гущыIэгъу тызыфэхъугъэр.

КъызэрэтиIуагъэмкIэ, Адыгэ Республикэм ибзылъфыгъэхэм я Союз дэн Iофым пылъхэм закъыфигъази дащыгъэ кIалэхэм плащ-шъхьарыхъонхэмрэ ошэкурхэмрэ афадынхэу къызялъэ­Iухэм апэ къезэгъыгъэхэм ащыщыгъ. ШэкI пытэу псы зы­пхырымыкIырэм фэдэ къызыфащэм, зы тхьамафэкIэ плащ 35-рэ афидыгъагъ. ЛэжьапкIэр къыратыжьынэу заIом афидэгъагъэп. Союзым ипащэу Вэ­рэкъо Хьалимэти ар къыгъэшъып­къэжьыгъ. ХэушъхьафыкIыгъэ дзэ операцием хэлэжьэрэ ныб­жьыкIэхэм ылъэкIыщтымкIэ IэпыIэгъу зэрафэхъугъэри ыгъэ­шIэгъуагъэп. «Сэ сшъхьэ сегупшысэжьыгъ. Сэри кIалэ сиI, хэт исабыи къиныгъо имыфэнэу, дунаир мамырынэу сафэлъэ­Iуагъ», — еIо Римэ.

Нэужыми джыри плащ-шъхьарыхъон 35-рэ ошэкури 100-рэ ыдыхи Украинэм арагъащэхэрэм ахигъэхъуагъ.

Лъэпкъым идахэ еIэты

Римэ ымыдырэ пкъыгъо щыIэп пIоми, ухэукъощтэп. Ахэр адыгэ шъуашэх, джанэх, кIэлэцIыкIу щыгъыных, столтехъох, шъхьаныгъупчъэIухъох, лIэкъо тамыгъэх, быракъых, нэмыкIых. Ау ыдырэ пстэум идэхагъэкIэ зыми фэмыдэу адыгэ саер апэ къеуцо.

Адыгэ шъуашэр щыгъэу нысэр пчэгум къызыращэкIэ, джэгум къэкIуагъэхэр езэрэгъэплъых, ащ нэр пIэпехы, дэхэ дэд. «Ри­мэ ыдыгъэхэм ащыщ» бзылъфыгъэхэм аIоу бэрэ зэхэпхыщт. Зигугъу ашIырэр ХьапэкIэ Рим, Шэуджэн районым ит къуаджэу Пщычэу щэпсэу, иIэпэIэсагъэрэ ыцIэрэ чыжьэу Iугъэх, бэмэ афэдэ.

КIэлэегъадж, депутат

ИцIыкIугъом къыщегъэжьа­гъэу ыгукIэ фаеу къыздырихьакIыгъэ Iофым Римэ къызыфигъэзэжьыгъэр кIэлэегъэджэ сэнэхьатыр зегъэтIылъыжьыр ары.

ЕджапIэр «дышъэ медалькIэ» къыухи, Воронеж дэт технологическэ университетым ще­джагъ, Краснодар дэт апшъэрэ еджапIэр къыухыжьыгъ. Рай­оным исатыу предприятиеу «Общепитым» Iоф щишIагъ, тьюторэу кIэлэеджа­кIохэм ахэтыгъ. Адыгэ къэралыгъо университетым хьисапымрэ информатикэмрэкIэ ифа­культет къыухи, Хьатыгъу­жъыкъое гурыт еджапIэм мы предметхэмкIэ кIэлэцIыкIухэр щыригъэджагъэх.

Адыгэ Республикэм и Къэралыгъо Совет — Хасэм ыкIи Адыгэ Республикэм гъэсэны­гъэм­рэ шIэныгъэмрэкIэ и Министерствэ я Щытхъу тхылъхэр къыфагъэшъошэгъагъэх. Апшъэ­рэ квалификационнэ категорие зиIэ кIэлэегъадж. ЧIыпIэ Советым идепутатыгъ.

Сыд фэдэ Iоф ышIагъэми уахътэм диштэрэ екIолIэкIэ зэфэшъхьафхэр ыгъэфедагъэх, пэрытыгъ.

ЫIитIукIэ ыдырэ, ыхъырэ пстэумэ творческэ лъэужыр къахэщы, ятеплъэхэр дахэ, кIэракIэх, зэкIужьых.

— ЦIыфхэм сафадэу сыхъущтми сшIэщтыгъэп. Ау японскэ машинэ дэгъу зэрэсиIэр зышIэ­хэрэр, гъунэгъухэр, Iахьылхэр, хъагъэхэр афыкIэсыдэнэу, нэмыкIхэр афэсыдынхэу къакIощтыгъэх. Щыгъынхэр, шъуа­шэхэр сыдыхэу зесэгъажьэм салонэу «Сэтэнаер» къызэIусхыгъагъ, — къеIуатэ Римэ.

ИщыкIэгъэ оборудованиер зэкIэ зэригъэгъотыгъэ, дэпIэ цех къызэIуихыгъ. ИкIэсэ дэн-хъэ-­ным пылъ, ащ гухахъо хегъуатэ. «Сыдми зыгорэ одыкIэ икъурэп. БгъэцакIэ­рэр цIыф­хэм ящыкIагъэу, лъэпкъ нэшанэм къып­къы­рыкIэу къы­хэпхымэ дэгъу», — еIо ащ. Ежьыри джащ фэдэ лъагъу зытетыр. Ижъы­кIэ къыщегъэ­жьагъэу агъэфедэ­­­- щ­тыгъэ тхыпхъэхэмрэ гухьарэ­хэмрэ анэмыкIэу ежьым къыхи­хыгъэ хъы­рахъи­шъэ­хэри егъэфедэх.

Хъяр зиIэ унагъохэу, зинысэ къизыщыщт цIыфхэм Римэ дэжь якъэкIон зэпагъэурэп. Зым на­хьи зыр нахь дахэу саехэр ахэм къяжэх, хэти ыгу рихьырэр къы­­хехы.

Хэхэс адыгэхэми афэдэ

Адыгеим щыпсэухэрэм афэшъхьафэу чIыпIэ чыжьэхэм ащыIэ адыгэхэми Римэ иIэшIагъэхэр анэсых. Иорданием, Тыркуем, Америкэм, Австрием, Германием, нэмыкIхэми иIэпэIэ­сагъэ ащагъэлъапIэ. ЯIахьылхэм зыфэе пкъыгъохэр къараIохэзэ, ежьым афедых, нэужым аIэкIагъэхьажьых. Бзылъфыгъэ Iэпэ­Iасэм коллекцие гъэшIэгъон иI, лъэпкъ тамыгъэхэу минищ фэ­диз ыугъоигъ. Бэмэ ятамыгъэ­хэр афыхидыкIыгъэх, быракъхэм, кушъэ IапIэхэм, нэмыкIхэм атырязгъэгъэуцохэри къахэкIых. Тамыгъэр зылъэгъурэ цIыфым зэрэадыгэр, лIакIо зэриIэр, ащ къыхэкIыгъэхэр зэрэзэрипхы­хэрэр агу къызэригъэкIырэр игуап.

«Тилъэпкъ щыщ цIыфхэу IэкIыбым щыпсэухэрэм сиIоф­шIагъэхэр агу зэрэрихьырэм, яхэ­кужъ агу къызэригъэкIырэм сегъэгушхо», — къытиIуагъ Римэ.

Исабыйхэр — инасып

Римэ инасыпыр исабыйхэр ары. Ахэр изакъоу къыIэтыгъэх, ишъхьэгъусэ жьэу идунай ыухыгъ. ПшъэшъитIуми, кIалэми апшъэрэ гъэсэныгъэ аригъэгъотыгъ. Светэрэ Хьалимрэ гражданскэ авиацием иакадемиеу Санкт-Петербург дэтыр къаухыгъэу Iоф ашIэ. Анжелэ экономист, IэкIыб хэгъэгубзищ ешIэ, Адыгэ Респуб­ликэм гъэсэныгъэмрэ шIэны­гъэм­рэкIэ и Министерствэ иIофышI. — Къиныгъохэр къызэсынэкIи слъакъо сыкъытеуцуагъ. СызщыкIэрэ щыIэп, сшIэрэм гухахъо хэсэгъуатэ, сызфыщыIэр сисабыйхэр ары, — къытиIуагъ Римэ.

Исабыйхэми янэ зэхашIыкIы, агъэлъапIэ, ищыкIагъэмэ, пкъэоу къыкIэуцох. Мары зэхэIэбэжьыхи, Римэ зыкIэхъопсыщтыгъэ оборудование лъапIэу Германием къыщашIырэр къащэфыгъ. АгъэгушIуагъ ыкIи агъэгушхуагъ.

Ежь фэдэу икIали ипшъашъэ­хэри лэжьакIох. Мышъхьахырэм рихьыжьэрэ Iофыр къыдэхъущт. УныбжьыкIэмэ, гъогур Iухыгъ. Рими, исабыйхэми ягухэлъхэр къадэхъунхэу афэтэIо.

Шъаукъо Аслъангуащ.